Álıhan Smaıylov: Jambyl oblysyndaǵy eń ózekti máseleniń biri – sýmen qamtamasyz etý
Premer-Mınıstrdiń aıtýynsha, búginde óńir úshin eń ózekti máselelerdiń biri sýmen qamtamasyz etý bolyp otyr. Máselen, oblystaǵy 367 aýyldyń 285-i ǵana aýyzsýmen qamtylǵan. Oblys ortalyǵy ortalyqtandyrylǵan sýmen 94%-ǵa, Shý qalasy 67%-ǵa qamtamasyz etilgen.
Sý tartý boıynsha da problemalar bar. Atap aıtqanda, oblys ortalyǵynda káriz-tazartý qurylystary joq, al 1962 jyly salynǵan aǵyn sýlardy súzý alańdarynyń ábden tozyǵy jetken.
«Shý jáne Talas ózenderindegi sý deńgeıiniń tómendeýine, sýarý júıeleriniń tozýyna baılanysty oblys eginshileri jyl saıyn sýdan tapshylyq kórip otyr. Osy máseleler boıynsha shuǵyl jáne túbegeıli sharalar qabyldaý kerek», - dedi Álıhan Smaıylov.
Osyǵan baılanysty Úkimet basshysy sý únemdeıtin tehnologııalardy belsendi paıdalanyp, gıdrotehnıkalyq qurylystardy jańǵyrtyp, magıstraldyq kanaldardy betondaý qajettigin aıtty. Oǵan qosa vegetatsııalyq kezeńde sý ysyrabyn boldyrmaý úshin úsh úlken, sondaı-aq birqatar shaǵyn sý qoımasyn salý kerek.
Óńirdiń damý perspektıvalaryn eskere otyryp, Premer-Mınıstr jylýmen jabdyqtaý nysandary men jelilerine, onyń ishinde monoqalalarda tehnıkalyq tekserý jáne jańǵyrtý jumystaryn júrgizý qajettigi týraly aıtty.
Úkimet basshysy Jambyl, Jýaly, Qordaı, Moıynqum jáne Talas aýdandarynyń eldi mekenderin gazdandyrý jobalaryna qarjy bólý múmkindigin qarastyrýdy, bıofarmatsevtıkalyq zaýyttyń óndiristik qýatyn ulǵaıtý maqsatynda qurylys jumystarynyń 2-kezeńin bıyl jyl sońyna deıin aıaqtaýdy, Taraz, Jańatas, Qarataý jáne Shý qalalaryndaǵy kópqabatty turǵyn úılerdi kúrdeli jóndeý jobalaryn qarjylandyrý máselesin qarastyrýdy tapsyrdy.
