Álıhan Smaıylov Wipon, Wipon PRO qosymshalarynyń nátıjesin atady

ASTANA. QazAqparat - 2018 jyly Wipon, Wipon PRO qosymshalarynyń arqasynda 330 myń bótelke jalǵan alkogol ónimderi anyqtaldy. Bul týraly búgin Májilistegi «Salyqtyq jáne kedendik ákimshilendirýdegi tsıfrlyq tehnologııalar» taqyrybyndaǵy Úkimet saǵatynda Qarjy mınıstri Álıhan Smaıylov aıtty, dep habarlaıdy QazAqparat tilshisi.

Májilis depýtaty Beıbit Mamraevtyń aıtýynsha, 2018 jyldyń 1 qańtarynan bastap alkogol ónimin óndirýshilerge, kóterme jáne bólshek saýdada ótkizýshilerge esepke alý-baqylaý markalaryn sáıkestendirý aspaptarynsyz alkogol ónimderin saqtaýǵa jáne ótkizýge tyıym salynǵan. Osy normany saqtamaǵany úshin 50-den 600 aılyq eseptik kórsetkishke deıin aıyppul salynatyndyǵyn eske saldy.

«Qoldan jasalǵan ónimderden qorǵalý maqsatynda Memlekettik kirister komıteti Wipon jáne Wipon PRO qosymshalaryn iske qosty. Bul qosymshalar arqyly satyp alýshylar men kásipkerler esepke alý-baqylaý markalaryn qoldan jasamaǵandyǵyn jáne satylatyn alkogol ónimin jalǵandyǵyn bile alady. Atalǵan qosymshalardy paıdalanýdyń nátıjesi qandaı? Osy normany engizgennen keıingi 1 jyldyń ishinde jaǵdaı qanshalyqty ózgerdi? Bul baǵytta qosymsha taǵy qandaı sharalar qoldanýǵa bolady?», - dep surady depýtat Qarjy mınıstrinen.

Álıhan Smaıylovtyń aıtýynsha, Wipon arnaıy qosymshasy tutynýshylarǵa, al Wipon PRO qosymshasy kásipkerler men satýshylarǵa arnalǵan.

«Byltyrǵy jyldyń qorytyndysy boıynsha atalǵan qosymshalardyń kómegimen 34 mln bótelke tekserildi. 330 myńǵa jýyq bótelke tekserýden ótpeı qaldy. Jalpy, Memlekettik kirister organdary osy málimetterdiń negizinde alkogol ónimderin óndiretin, spırt shyǵaratyn jasyryn 23 tsehty japty. Bul jumys odan ary jalǵasady. Bizdiń oıymyzsha jeke kásipkerler osy sııaqty ózge de qosymshalardy naryqqa shyǵarýy kerek», - dedi ol.

Sonymen qatar Á.Smaıylov alkogoldi ónim shyǵaratyn 46 zaýytqa baqylaý qurylǵylary ornatylǵanyn aıtty.

«Olar kúndiz-túni óndiristiń kórsetkishterin, elektr tutyný kórsetkishin kórsetip turady. Osy baqylaý aspaptarynyń kómegimen byltyr 2 JShS-nyń lıtsenzııasyn qaıtaryp aldyq. Sebebi olar zańsyz alkogol ónimderin shyǵaryp kelgen», - dedi mınıstr.