Álıhan Smaıylov úılerdegi avtonomdy qazandyqtardy qaýipsiz qashyqtyqqa shyǵarýdy tapsyrdy

ASTANA. QazAqparat – Ákimdikter avtonomdy qazandyqtardy turǵyn úılerden qaýipsiz qashyqtyqqa shyǵarý máselesin tolyq sheshýi tıis. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Jylytý maýsymy endi bastaldy. Jalpy respýblıka boıynsha órt oqıǵalary men odan zardap shekkender protsenti tómendedi. Degenmen, Abaı, Jambyl, Shyǵys Qazaqstan, Qaraǵandy, Ulytaý oblystarynda jáne elordada órt oqıǵalarynyń sany artty. Kóp jaǵdaıda órt qaýipsizdiginiń qarapaıym talaptaryn buzý sebep bolady. Osyǵan oraı qaýipsizdik talaptaryn saqtaýǵa, órttiń aldyn alýǵa baǵyttalǵan keshendi sharalar qabyldaý qajet», - dedi Úkimet basshysy.

Osy rette Álıhan Smaıylov ınspektsııalardyń ókilettikterin kúsheıtý boıynsha jumys júrgizý kerektigin basa aıtty.

«Adamdar anyqtalǵan buzýshylyqtardy joıýǵa jáne bolashaqta olardyń aldyn alýǵa ózderi múddeli bolýy tıis. Sonymen birge avtonomdy qazandyqtardy turǵyn úılerden qaýipsiz qashyqtyqqa shyǵarý máselesi osyǵan deıin birneshe ret kóterildi. Óńir ákimderi osy máseleni tolyǵymen sheshýi, tıisti sharalar qabyldaýy kerek», - dedi Premer-Mınıstr.