Álıhan Smaıylov Ulttyq ekonomıka mınıstrliginiń alqa májilisin ótkizdi
Vedomstvo basshysy Álibek Qýantyrov qańtar-qarasha aılarynda ekonomıka ósimi 2,7%-dy quraǵanyn atap ótti. Syrtqy saýda aınalymy 34%-ǵa ósip, $111 mlrd-qa jetti.
Bıyl jańa ınvestıtsııalyq tsıkldy qalyptastyrýǵa, sondaı-aq jańa trendterdi, onyń ishinde ESG standarttaryn eskere otyryp, ınvestıtsııalardy tartý saıasatyn qaıta qaraýǵa baǵyttalǵan 2026 jylǵa deıingi Investıtsııalyq saıasat tujyrymdamasy qabyldandy.
Mınıstrdiń aıtýynsha, óńirlerdi damytý baǵytynda aýqymdy jumys atqaryldy. Atap aıtqanda, eldiń 2025 jylǵa deıingi aýmaqtyq damý jospary bekitildi.
Tarıftik saıasatty reformalaý úshin «Tarıfti ınvestıtsııaǵa aıyrbastaý» jańa tujyrymdamasy usynylyp otyr. 2029 jylǵa qaraı respýblıkada ınjenerlik jelilerdiń tozýyn 20%-dyq pýnktke deıin tómendetý kórsetkishine qol jetkizý kózdelgen. Ol úshin shamamen 3,8 trln teńge ınvestıtsııa tarta otyryp, 134 myń km astam jelige jóndeý júrgizý qajet bolady. Máselen, kelesi jyly 13,2 myń km jylý jáne elektrmen jabdyqtaý jelilerin jóndeý úshin shamamen 300 mlrd teńge tartý jáne tabıǵı monopolııalar salasyndaǵy qyzmetkerlerdiń jalaqysyn 50%-ǵa deıin arttyrý kózdelip otyr.
Sonymen qatar alqa májilisinde kásipkerlikti, qarjy sektoryn, óńirlerdi, memlekettik basqarýdy jáne t. b. odan ári damytý boıynsha josparlanǵan sharalar qaraldy.
Premer-Mınıstr Ulttyq ekonomıka mınıstrliginiń negizgi maqsaty – halyqtyń turmys deńgeıi men ál-aýqatynyń artýyn naqty qamtamasyz etetin birtutas jáne tıimdi ekonomıkalyq saıasat qalyptastyrý ekenin atap ótti.
Onyń aıtýynsha, aǵymdaǵy syrtqy ekonomıkalyq konıýnktýra belgisizdiktiń joǵary deńgeıimen sıpattalady. Álemdik ekonomıkada energııa resýrstary men azyq-túlik taýarlary baǵalarynyń ósýi barlyq jerde baıqalyp otyr.
«Úkimet týyndap jatqan táýekelderdi joıý úshin bar kúshin salady. Biraq, ókinishke oraı, álemdik ekonomıkadaǵy jaǵdaı áli de turaqsyz kúıde qalyp otyr. Syrtqy faktorlar Qazaqstan ekonomıkasynyń ósý qarqynyna jáne tıisinshe ekonomıkalyq belsendilikke óz áserin tıgizýde. Osyǵan baılanysty 2023 jyly Ulttyq ekonomıka mınıstrliginiń aldynda birqatar mańyzdy mindetter tur», — dedi Álıhan Smaıylov.
Ol birinshi kezekte Memleket basshysynyń 1 qyrkúıekte Qazaqstan halqyna Joldaýynda, 12 jeltoqsanda Úkimettiń keńeıtilgen otyrysynda bergen tapsyrmalaryna, sondaı-aq Prezıdenttiń saılaýaldy baǵdarlamasyna basa nazar aýdarý qajet ekenin atap ótti.
2023 jyly keminde 4% ekonomıkalyq ósimge qol jetkizý úshin ishki naryqty otandyq taýarlarmen toltyrýǵa, aǵymdaǵy syn-qaterlerdi eskere otyryp, ınflıatsııa deńgeıin baqylaý men tómendetý jónindegi sharalar keshenin jandandyrýǵa, eldiń ınvestıtsııalyq tartymdylyǵyn arttyrýǵa, kásipkerlikti damytýǵa, memlekettiń ekonomıkadaǵy úlesin qysqartýǵa jáne t. b. nazar aýdarý qajet.
«Prezıdent tapsyrmalaryn eskere otyryp, salalyq tujyrymdamalar men memlekettik organdardyń damý josparlaryn ózektendirý qajet. Biz memlekettik organdarǵa salalyq quzyretter sheńberinde derbes sheshimder qabyldaý úshin barlyq múmkindikterdi berýge tıispiz. Sondaı-aq jergilikti deńgeıdegi máselelerdi sheshý úshin óńirlerdiń ókilettikterin keńeıtýimiz kerek. Bul jumys Ulttyq ekonomıka mınıstrliginiń úılestirýimen júrgizilýi tıis», — dedi Álıhan Smaıylov.
Foto: primeminister.kz
