Álıhan Smaıylov: Ult densaýlyǵyn nyǵaıtý – memleketimizdiń eń mańyzdy basymdyǵy

ASTANA. QazAqparat – Premer-Mınıstr Álıhan Smaıylov medıtsına qyzmetkerlerin kásibı merekemen quttyqtady, dep habarlaıdy QazAqparat.

«Sizderdi Medıtsına qyzmetkeri kúnimen shyn júrekten quttyqtaımyn! Adam ómirin saqtap, densaýlyǵyn nyǵaıtý jolynda aq halatty abzal jandardyń eńbegi ushan-teńiz.

Árdaıym baqytty ǵumyr keship, qıyn da aýyr eńbekterińizdiń jemisin kórińizder.

Ult densaýlyǵyn nyǵaıtý – memleketimizdiń eń mańyzdy basymdyǵy.

Qajyr-qaıratty talap etetin osynaý mártebeli mindet aq halatty abzal jandardyń ıyǵynda ekeni sózsiz.

Qazaqstanda medıtsınanyń birqatar baǵyty qazirdiń ózinde halyqaralyq deńgeıde tabysty básekelestikke túsýde. Búginde halyqqa joǵary tehnologııalyq medıtsına qyzmetteri qoljetimdi. Ulttyq ǵylymı kardıohırýrgııa, Ulttyq neırohırýrgııa, ıAdrolyq medıtsına jáne basqa da kóptegen zamanaýı medıtsına ortalyqtary jumys istep tur», - dep jazdy Úkimet basshysy.

Á.Smaıylov Memleket basshysynyń tapsyrmasy aıasynda «Aýyldyq densaýlyq saqtaýdy jańǵyrtý» ulttyq jobasyn júzege asyrý bastalǵanyn eske saldy. Onyń sheńberinde bıyl 309 alǵashqy medıtsınalyq-sanıtarlyq kómek kórsetý nysany salynady.

«Memleket aldaǵy ýaqytta da qazaqstandyq dárigerlerdiń eńbegin baǵalap, ál-aýqatyn jaqsartý jolynda bar kúsh-jigerin salady.

Eren eńbekterińiz úshin myń alǵys! Sizderge myqty densaýlyq, qajymas qaırat, bolashaqqa senim, abyroı jáne tabys tileımin!», - dedi Premer-Mınıstr.