Álıhan Smaıylov Úkimet aldaǵy ýaqytta sheshetin mindetterdi atady
«Ekonomıkany ártaraptandyrýǵa, ishki naryqty otandyq taýarlarmen qamtamasyz etýge jáne qosylǵan quny joǵary shıkizattyq emes taýarlar óndirisin ulǵaıtýǵa basymdyq beriledi. El ekonomıkasyna, birinshi kezekte óńdeýshi salalarǵa aýqymdy ınvestıtsııa tartý boıynsha is-sharalar qabyldanady. Aýyl sharýashylyǵyn damytý jáne azyq-túlik qaýipsizdigin qamtamasyz etý úshin keshendi jumys atqarylady. Sonymen qatar energetıka salasyn damytý jáne kommýnaldyq ınfraqurylymdy damytý máseleleri óte mańyzdy. Іshki naryqty janar-jaǵarmaımen qamtamasyz etýge erekshe nazar aýdarylady. «Tarıf ornyna ınvestıtsııa» baǵdarlamasyn iske asyrý elektr jáne kommýnaldyq jelilerdiń tozýyn tómendetýge múmkindik beredi», - dedi Álıhan Smaıylov Májilistiń jalpy otyrysynda.
Onyń atap ótýinshe, «Aýyl - el besigi» jobasy aıasynda aýyldyq ınfraqurylymdy jańǵyrtý jumystary keńeıtiledi. Kólik jáne logıstıka salasynyń ótkizý qabiletin arttyrýǵa jáne halyqaralyq dálizderdi damytýǵa basymdyq beriletin bolady.
«Bilim berý jáne densaýlyq saqtaý salalarynda qyzmetterdiń tıimdiligi men sapasyn jaqsartý, sonymen qatar tsıfrlandyrýdy ári qaraı jalǵastyrý, memlekettik biryńǵaı tsıfrlyq platformany engizý bizdiń jumysymyzdyń mańyzdy baǵyttary bolady. Úkimettiń aldyna qoıylǵan mindetterdi sheshý úshin tıisti is-sharalar qoldanylady. Parlament depýtattary ózara birlesip, úılesimdi jáne nátıjeli jumys jasaımyz dep senim bildiremin», - dedi Premer-Mınıstr.
