Álıhan Smaıylov TMD saýda salasyndaǵy tosqaýyldar men shekteýlerdi joıýǵa shaqyrdy

SOChI. QazAqparat - Sochı qalasyna (RF) jumys sapary aıasynda Qazaqstan Respýblıkasynyń Premer-Mınıstri Álıhan Smaıylov Táýelsiz Memleketter Dostastyǵyna múshe elder Úkimet basshylary keńesiniń kezekti otyrysyna qatysty, dep habarlaıdy QazAqparat Úkimettiń resmı saıtyna silteme jasap.

Shaǵyn quramda ótken kezdesýde taraptar TMD-daǵy ekonomıkalyq ózara is-qımyldyń ózekti máseleleri boıynsha pikir almasyp, Kórsetiletin qyzmetterdiń erkin saýdasy, ınvestıtsııalar qurý, qyzmeti jáne olardy júzege asyrý týraly kelisimdi talqylady. Keńeıtilgen quramdaǵy kezdesýde Dostastyq elderi arasyndaǵy ónerkásiptik kooperatsııany damytýǵa basa nazar aýdaryldy.

Álıhan Smaıylov óz sózinde TMD ıntegratsııalyq baılanystardy tereńdetý jáne kópjaqty yntymaqtastyqty saqtaý úshin mańyzdy alań retinde qala beretinin atap ótti.

«Qazaqstan osy alańdaǵy ózara is – qımyldy odan ári tereńdetýge, Dostastyqtyń áleýetin nyǵaıtýǵa jáne múmkindikterin ashýǵa múddeli», — dedi ol.

Premer-Mınıstr negizgi baǵyttardyń biri – ózara saýda aınalymynyń kólemin arttyrý ekenin basa aıtty. Máselen, ótken jyly Qazaqstan men TMD elderi arasyndaǵy taýar aınalymynyń kólemi 9%-ǵa ósip, $36 mlrd-tan asty, bul rette osy jyldyń alǵashqy 3 aıynda 9% deńgeıinde ósim tirkeldi.

«Bul kórsetkishtiń artýy negizinen TMD-nyń erkin saýda aımaǵy týraly kelisimdi júzege asyrý esebinen qamtamasyz etiledi. Sonymen qatar qazirgi jaǵdaıda biz TMD elderinde ózara saýda-sattyqtaǵy tosqaýyldardy, shekteýlerdi joıý boıynsha jumysty aıtarlyqtaı kúsheıtýimiz qajet», — dedi Álıhan Smaıylov.

Osy turǵyda ol tıisti jumys toby qyzmetiniń mańyzdylyǵyn jáne ózara saýda-sattyqtaǵy tehnıkalyq kedergiler týraly kelisim jasaý qajettigin atap ótti.

Sonymen birge, Úkimet basshysynyń aıtýynsha, qyzmetterdiń erkin saýdasy týraly kelisimge qol qoıý TMD keńistigindegi mańyzdy oqıǵaǵa aınalady.

«Bul kelisim dostastyq keńistiginde qosymsha múmkindikter ashatynyna jáne ekonomıkamyzdyń odan ári ósýine qolaıly jaǵdaı jasaıtynyna senimdimiz», — dep atap ótti Álıhan Smaıylov.

Sondaı-aq Premer-Mınıstr qazirgi jaǵdaıda elektrondy saýdanyń róli aıtarlyqtaı artyp kele jatqanyn aıtty. TMD-nyń osy baǵyttaǵy áleýetin ashý úılestirilgen is-qımyl men birlesken jumysty talap etedi. Osyǵan baılanysty Qazaqstan yntymaqtastyqtyń tıisti tujyrymdamasyn ázirleýdi qoldaıdy.

Sondaı-aq Álıhan Smaıylov atap ótkendeı, ónerkásiptik kooperatsııa mańyzdy mindet bolyp qala beredi.

«Ónerkásip ekonomıkalyq damýdyń negizgi qozǵaýshy kúshi bolyp tabylady jáne biz osy saladaǵy yntymaqtastyqty nyǵaıtý baǵytynda naqty qadamdar jasap jatyrmyz. Bul oraıda TMD elderiniń ónerkásiptik yntymaqtastyǵy tujyrymdamasy men TMD elderiniń 2030 jylǵa deıingi ónerkásiptik kooperatsııany damytý jónindegi sharalar kesheni eleýli serpin beredi dep kútemiz», — dedi ol.

Sonymen qatar turaqty damýdyń mańyzdy sharttarynyń biri – «Jasyl» ekonomıkaǵa kóshý. Osylaısha, Qazaqstan resýrstardy paıdalaný tıimdiligin arttyrý jáne qorshaǵan ortaǵa áser etetin jaǵymsyz faktorlardyń aldyn alý boıynsha júıeli jumystardy júrgizýde.

«TMD elderiniń barlyǵy ortaq mindetter qoıyp otyrǵanyn eskere otyryp, Dostastyq elderiniń úkimetterin osy baǵytta kúsh-jigerdi biriktirýge shaqyramyn. Astanadaǵy Halyqaralyq jasyl tehnologııalar jáne ınvestıtsııalyq jobalar ortalyǵy birlesken jumys alańy bola alady», — dep túıindedi sózin Premer-Mınıstr.

Kezdesý nátıjesinde birqatar kelisimder men basqa da qujattarǵa qol qoıyldy.