Álıhan Smaıylov: Taýarlardy tańbalaýda kósh sońynda qalýǵa bolmaıdy
«Taýarlardy tańbalaý jáne qadaǵalaý júıesin engizý - Eýrazııalyq ekonomıkalyq odaqtyń kún tártibindegi eń ózekti máseleleriniń biri. Reseı tarapy tańbalaýdy óz aýmaǵynda belsendi qoldanady. Bul taýarlardyń keń spektri – temeki, aıaq kıim, dári-dármekter, fotoapparattar, avtoshınalar, jeńil ónerkásip taýarlary, ıis sýlar, sút ónimderi. Tańbalaý arqyly kontrafakt ónimdi anyqtaý adal básekelestik úshin teń jaǵdaı jasaýǵa múmkindik beredi. Tańbalaýdy engizý boıynsha kósh sońynda qalýǵa bolmaıdy», - dedi Álıhan Smaıylov Úkimet otyrysynda.
Onyń aıtýynsha bul kóshten qalý ónerkásip salalary úshin úlken qaýip týdyrady. Reseılik naryqqa arnalǵan tańbalanbaǵan ónimder bizdiń naryqqa tómen baǵamen kóp kólemde kelýi múmkin.
«Mundaı jaǵdaı ishki naryqta qazaqstandyq óndirýshilerdi óz naryǵynan yǵystyryp shyǵarý qaýipi bar. Jáne Eýrazııalyq ekonomıkalyq odaqtyń basqa elderiniń naryqtaryna eksporttaý máselesi qıyndaıdy. Osyǵan baılanysty, elimizde taýarlar nomenklatýrasyn keńeıtýdiń túsinikti algorıtmimen tańbalaýdy engizý jónindegi jumysty belsendi júrgizý kerek», - dedi ol.
