Álıhan Smaıylov Tashkentte Ózbekstan Prezıdentimen kezdesti

ASTANA. QazAqparat- Tashkentte Qazaqstan Premer-Mınıstri Álıhan Smaıylov pen Ózbekstan Prezıdenti Shavkat Mırzıeev kezdesti, dep habarlaıdy QazAqparat Úkimettiń resmı saıtyna silteme jasap.

Álıhan Smaıylov Memleket basshysy Qasym-Jomart Toqaevtyń ystyq sálemin jetkizip, Qazaqstan men Ózbekstannyń arasyndaǵy ekijaqty qarym-qatynas senim men ózara túsinistikke negizdelgen strategııalyq áriptestiktiń jarqyn úlgisi ekenin atap ótti. Atap aıtqanda, joǵary deńgeıde ótken sońǵy kelissózder qorytyndysy boıynsha qol jetkizilgen ýaǵdalastyqtardy iske asyrý – eki el Úkimetteriniń erekshe baqylaýynda.

Sonymen qatar Premer-Mınıstr Ekijaqty yntymaqtastyq jónindegi úkimetaralyq komıssııanyń 20-otyrysynyń qorytyndysy týraly habardar etti, onda ónerkásip, aýyl sharýashylyǵy, energetıka, ekologııa, tranzıttik-kólik salasyndaǵy jáne t.b. ózara is-qımyl máseleleri egjeı-tegjeıli talqylandy. Ózara saýdadaǵy taýarlar nomenklatýrasyn keńeıtý, jańa ınvestıtsııalyq jáne kooperatsııalyq jobalardy iske qosý jónindegi jumysty jalǵastyrý jóninde ýaǵdalastyqtarǵa qol jetkizildi.

Qazaq-ózbek shekarasynda eki eldiń ónerkásip salasyndaǵy tıimdi ózara is-qımylyna serpin beretin «Ortalyq Azııa» halyqaralyq ónerkásiptik kooperatsııa ortalyǵyn salýdyń mańyzdylyǵy erekshe atap ótildi.

Kezdesý qorytyndysy boıynsha memleketaralyq yntymaqtastyqty odan ári damytý úshin eki eldiń úkimetteri belsendi jumysty jalǵastyrýǵa daıyn ekendigi aıtyldy.

Osyǵan deıin Qazaqstan men Ózbekstan ózara taýar aınalamyn 10 mlrd dollarǵa jetkizýdi kózdep otyrǵanyn jazdyq.