Álıhan Smaıylov Saýda jáne ıntegratsııa mınıstrligin qurýǵa ne túrtki bolǵanyn aıtty

NUR-SULTAN. QazAqparat - Premer-mınıstrdiń birinshi orynbasary - Qarjy mınıstri Álıhan Smaıylov jańadan qurylǵan Saýda jáne ıntegratsııa mınıstrliginiń jumysy týraly aıtyp berdi, dep habarlaıdy QazAqparat tilshisi.

«Jańadan qurylǵan Saýda jáne ıntegratsııa mınıstrligine Ulttyq ekonomıka mınıstrliginiń ishki jáne syrtqy saýda salasy, saýdany jyljytý, sonymen qatar Indýstrııa jáne ınfraqurylymdyq damý mınıstrliginiń tehnıkalyq retteý komıtetiniń mindetteri beriledi. Sondaı-aq, Syrtqy ister mınıstrligine júktelgen eksportty jyljytýdy úılestirý de - jańa mınıstrliktiń quzyrynda», - dedi Álıhan Smaıylov Úkimet otyrysynan keıin tilshilerdiń suraǵyna jaýap bere otyryp.

Onyń aıtýyna qaraǵanda, qazirgi tańda qazaqstandyq taýarlardyń saýdalanýyn sheteldik naryqtarda júrgizip, ishki naryqty sapasyz ımporttyq taýarlardan saqtaý kerek.

«Sol sebepti búgingi kúni bizdiń saýda saıasatyn kúsheıtýge den qoıylyp otyrǵanyn atap ótý kerek. Sonymen birge, qazaqstandyq ekonomıkany álemdik ekonomıkaǵa ıntegratsııalaýǵa baǵyttalǵan sharalar qabyldanýda», - dedi mınıstr.

Onyń aıtýyna qaraǵanda, atalmysh vedomstvonyń qurylýyna ártúrli memleketterdiń bir-birine sanktsııa qoıýy da sebep bolǵan.

«Álemdik arenada, memleketter arasynda saýda-protektsıondyq soǵys údeı tústi. Aımaqtyń ózinde keıbir kórshi memleketter keıbir taýarlarǵa keden poshlınasyn tómendete bastaǵanyn, óz óndirisi úshin shıkizatty óńdeı bastaǵanyn, osylaısha ónimniń básekege qabiletti bola túskenin baıqap otyrmyz. ıAǵnı, taýardy ótkizýde básekelestik qyza tústi. Kúres kúsheıip kele jatqandyqtan, osy saladaǵy jumysty kúsheıtý kerektigi týraly sheshim qabyldandy. Sol sebepti, jańa mınıstrlik quryldy», - dedi spıker.