Álıhan Smaıylov salyq salasyndaǵy mańyzdy talaptardy atady

NUR-SULTAN. QazAqparat – Parlament Májilisiniń jalpy otyrysynda «Salyqtyq bazany búrkemeleýge jáne paıdany salyq salý aıasynan alyp ketýge qarsy is-qımyl jasaý maqsatynda salyqtyq kelisimderge qatysty sharalardy oryndaý jónindegi kópjaqty konventsııany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Qazaqstan Respýblıkasynyń Qarjy mınıstrligi salyqtardy tóleýden jaltarýǵa qarsy kúreske baǵyttalǵan Ekonomıkalyq damý jáne yntymaqtastyq uıymynyń jańa jobasy – BEPS-ke Qazaqstannyń qatysýyna bastama jasady. Bul konventsııa 2016 jyly 24 qarashada qabyldandy jáne oǵan Qazaqstan Respýblıkasy 2018 jyly 25 maýsymda qol qoıdy.

«Osy halyqaralyq shartqa qosylýdyń mańyzdylyǵy men qajettiligin atap ótkim keledi, óıtkeni bul Eýropalyq Odaqtyń dırektıvasyna sáıkes, BEPS jobasynyń barlyq qatysýshylary úshin mindetti shart bolyp tabylady. Bul konventsııa barlyq ekijaqty salyqtyq konventsııalarǵa salyq salýdan jaltarýǵa qarsy is-qımylǵa baǵyttalǵan ózgerister engizedi. Bul rette Kópjaqty konventsııa tek osy konventsııaǵa qosylǵan memleketterdiń ekijaqty salyqtyq konventsııalaryn qamtıdy», - dedi QR Premer-Mınıstriniń birinshi orynbasary - Qarjy mınıstri Álıhan Smaıylov.

Kópjaqty konventsııada kózdelgen negizgi ózgerister: birinshiden, zańdy tulǵalardyń qos rezıdenttik máselesin sheshý tártibi anyqtalǵan; ekinshiden, kirispe mátini eki memlekette de, atap aıtqanda kiris kózi bolatyn memlekette jáne tabys alýshynyń rezıdenttigi bolatyn memlekette kiristerdi salyq salýdan bosatý múmkindigin boldyrmaý bóligimen tolyqtyryldy; úshinshiden, eger mámileniń maqsaty tek jeńildikterdi alý bolsa, jeńildikterdi qoldanýdy shekteıtin ereje kózdelgen.

«Budan basqa, biz «Atameken» ulttyq palatasy alańynda bıznes-qaýymdastyq ókilderimen Kópjaqty konventsııanyń erejelerin túsindirý maqsatynda birneshe ret kezdesý ótkizdik.Bir jaǵynan Kópjaqty konventsııaǵa qosylý halyqaralyq standarttarǵa sáıkes bolýǵa tyrysatyn el retinde Ekonomıkalyq yntymaqtastyq jáne damý uıymynyń aldynda Qazaqstannyń mártebesin kóteredi. Ekinshiden, salyq organdarynyń ekijaqty salyq konventsııalarynyń erejelerin qoldaný arqyly qurylǵan salyq shemalarynyń jolyn kesýdegi kúresiniń tıimdiligin arttyrýǵa múmkindik beredi. Konventsııany iske asyrý memlekettik bıýdjetten qarjy shyǵyndaryn talap etpeıdi», - dedi Á.Smaıylov.