Álıhan Smaıylov RF Úkimetiniń tóraǵasy Mıhaıl Mıshýstınmen kezdesý ótkizdi

NUR-SULTAN. QazAqparat - Sholpan-Atada (Qyrǵyzstan) ótip jatqan Eýrazııalyq úkimetaralyq keńes otyrysy alańynda QR Premer-Mınıstri Álıhan Smaıylov RF Úkimetiniń tóraǵasy Mıhaıl Mıshýstınmen kezdesý ótkizdi, dep habarlaıdy QR Úkimetiniń baspasóz qyzmeti.

Álıhan Smaıylov Qazaqstan men Reseı yntymaqtastyǵynyń nyǵaıýyna joǵary deńgeıdegi turaqty kezdesýlerdiń serpin berip otyrǵanyn, sondaı-aq eki el arasyndaǵy memleketaralyq baılanystar barlyq baǵyttar boıynsha ózara is-qımyldyń joǵary deńgeıine kóterilgenin atap ótti.

«Ózara múddelerdi eskere otyryp, dáıekti birlesken jumysty jalǵastyrýymyz kerek», — dedi Premer-Mınıstr.

Úkimet basshysy ótken 30 jyl ishinde memleketter arasynda senimdi jáne syndarly dıalog ornatylǵanyn atap ótti. Saýda-ekonomıkalyq yntymaqtastyq qarqyndy damyp keledi, óńiraralyq yntymaqtastyq jáne isker toptardyń baılanystary nyǵaıýda.

«Reseı – bizdiń negizgi saýda-ekonomıkalyq seriktesimiz. 2021 jyldyń qorytyndysy boıynsha ózara taýar aınalymy úshten birge ósip, $24,2 mlrd kóleminde rekordtyq kórsetkishke qol jetkizdik. 2022 jyldyń birinshi jartyjyldyǵynda da saýda 5%-ǵa artty. Jyl qorytyndysy boıynsha oń qarqyn saqtalyp, damıtynyna senim artamyz», — dedi Álıhan Smaıylov.

Sonymen qatar Premer-Mınıstr aǵymdaǵy jaǵdaıda ekijaqty saýda-ekonomıkalyq baılanystardyń kún tártibine jedel, salmaqty jáne ózara tıimdi sheshimderdi qajet etetin jańa tarmaqtar shyǵarylatynyn aıtty.

«Biz pragmatıkalyq jáne senimdi arnada júıeli, birlesken jumysty jalǵastyrýymyz kerek», — dep atap ótti Álıhan Smaıylov.

Óz kezeginde Mıhaıl Mıshýstın Reseıdiń Qazaqstanmen tatý kórshiligi men dostyǵyn baǵalaıtynyn atap ótti.

«Biz ımportty almastyrý boıynsha birlesken baǵdarlamalardy júzege asyrýdyń jaqsy perspektıvalaryn kórip otyrmyz. Ónerkásip, energetıka, mashına jasaý, kólik ınfraqurylymy, beıbit atom, tsıfrlandyrý sııaqty salalarda jańa strategııalyq jobalardy iske qosý úshin múmkindikter bar. Atalǵan máseleler bizdiń turaqty nazarymyzda», — dedi Mıhaıl Mıshýstın.

Kelissóz barysynda taraptar ónerkásiptik kooperatsııaǵa qajetti ónimderdi jetkizý, qazaqstandyq shıkizat tranzıti, sondaı-aq taýarlardy kedergisiz shyǵarý máselelerin talqylady. Sondaı-aq Qazaqstannyń soltústik jáne shyǵys óńirlerin gazdandyrý máseleleri, Kaspıı qubyr konsortsıýmy men «Astrahan-Mańǵyshlaq» magıstraldyq sý tartqyshynyń qyzmeti qaraldy.

Foto: primeminister.kz