Álıhan Smaıylov ózbekstandyq áriptesimen kezdesti

ASTANA. QazAqparat - Qazaqstan men Ózbekstan úkimet basshylary Álıhan Smaıylov pen Abdýlla Arıpov Almatyda ótken EÚAK otyrysynan keıin memleketaralyq yntymaqtastyqtyń birqatar negizgi máselelerin talqylady. Bul týraly QazAqparat Úkimettiń saıtyna silteme jasap habarlaıdy.

Taraptar saýda-ekonomıkalyq, kólik-tranzıttik jáne sý-energetıkalyq salalardaǵy ózara is-qımyldy, sondaı-aq ónerkásiptik kooperatsııa men aýyl sharýashylyǵyndaǵy birlesken qadamdardy arttyrý jónindegi josparlardy pysyqtady.

Álıhan Smaıylov respýblıkalar arasynda barlyq salalarda qarqyndy damyp kele jatqan berik úılesimdi qatynastar ornaǵanyn atap ótti. Ótken jyldyń qorytyndysy boıynsha ekijaqty taýar aınalymy shamamen 30%-ǵa ósip, josparlanǵan meje $5 mlrd-qa jetken.

«Bul ortaq kúsh-jigerimizdiń arqasynda múmkin boldy. Endi joǵary deńgeıde qoıylǵan mindetterge sáıkes, orta merzimdi kezeńde ózara saýda-sattyq kólemin $10 mlrd-qa deıin ulǵaıtý qajet», — dedi QR Premer-Mınıstri.

Onyń aıtýynsha, bul turǵyda byltyr qol qoıylǵan jol kartalaryn ýaqytyly ımplementatsııalaý jáne Qazaqstan-Ózbekstan úkimetaralyq komıssııasynyń belsendi jumysy mańyzdy bolyp tabylady.

«Qazaqstan úkimeti ózara is-qımyldyń barlyq baǵyttary boıynsha belsendi dıalogqa daıyn», — dedi Álıhan Smaıylov.

Óz tarapynan Abdýlla Arıpov elder arasynda ónerkásiptik kooperatsııanyń, ásirese avtomobıl jasaýda oń tájirıbe baryn atap ótti. Munaı-gaz, hımııa, energetıka, metallýrgııa jáne basqa da salalarda perspektıvti jobalar pysyqtalýda.

«Aýyl sharýashylyǵy men kólik-logıstıka salasyndaǵy, ásirese jańa kólik dálizderin damytý bóligindegi tyǵyz ózara is-qımyldy erekshe atap ótken jón. Sondaı-aq biz elderimizdiń óńirleri arasyndaǵy tikeleı baılanystardy joǵary baǵalaımyz, bul baýyrlas halyqtardyń arasyndaǵy yntymaqtastyq áleýetin tolyq iske asyrýǵa múmkindik beredi», — dedi Abdýlla Arıpov.

Foto: primeminister.kz