Álıhan Smaıylov ósim kórsetken salalardy atady
NUR-SULTAN. QazAqparat – QR Premer-Mınıstri Álıhan Smaıylov óndiris kólemi artqan negizgi salalardy atady, dep habarlaıdy QazAqparat tilshisi.
«Eki aıdyń qorytyndysy boıynsha Jalpy ishki ónimniń ósý qarqyny 3,5 paıyzǵa deıin artty. Turaqty ekonomıkalyq ósimniń draıveri naqty sektor boldy. Ónerkásip óndirisiniń kólemi - 4,7, onyń ishinde óńdeý ónerkásibi 3,9 paıyzǵa ósti. Ósim tirkelgen negizgi salalar: farmatsevtıkada - 17, kıim-keshek óndirisi - 12,8, mashına jasaý - 9,2, onyń ishinde lokomotıvter men vagondar óndirisi - 23,8, avtomobıl jasaý - 10,2, plastmassa ónimderiniń óndirisi - 8,7, daıyn metall buıymdary - 4,4, qurylys materıaldaryn shyǵarý - 2,1 paıyz. Taý-ken óndirisi 6,4 paıyz ornyqty ósimdi kórsetti. Bul saladaǵy turaqty ósimge munaı óndirýdi - 9,2, tabıǵı gazdy - 8,9 jáne metall kenderin 1,2 paıyzǵa ulǵaıtý esebinen qol jetkizilip otyr», - dedi Álıhan Smaıylov búgin Úkimet otyrysynda.
Onyń atap ótýinshe, kólik, saýda jáne baılanys salalary esebinen qyzmet kórsetý sektorynda 2,1 paıyz deńgeıinde oń ósim baıqaldy. Qurylys salasy 7,6 paıyzǵa ósti. 1,8 mln. sharshy metr turǵyn úı paıdalanýǵa berildi. Sondaı-aq shıkizattyq emes sektordaǵy turaqty ınvestıtsııalyq belsendilik jedel ekonomıkalyq ósimniń negizgi faktory boldy. Ken óndirý salasyn esepke almaǵanda ınvestıtsııalar 5,7 paıyzǵa artty.
«Qańtar-aqpan aılarynda Aqmola, Pavlodar oblystarynda jáne Nur-Sultan qalasynda barlyq negizgi makrokórsetkishter boıynsha ósim baıqalyp otyr. Eń tómen kórsetkish Aqtóbe jáne Mańǵystaý oblystarynda tirkeldi», - dedi Álıhan Smaıylov.
