Álıhan Smaıylov orynbasarlary arasynda mindetterdi bólý týraly ókimge qol qoıdy
Qujatqa sáıkes, Premer-Mınıstrdiń birinshi orynbasary Roman Sklıardyń mindetterine kólik ınfraqurylymyn jáne logıstıkany, qurylysty damytý jáne TKSh jańǵyrtý máseleleri engizildi. Sondaı-aq R. Sklıar energııa únemdeý jáne energııa tıimdiligin arttyrý, jańartylatyn energııa kózderin, kómir, atom ónerkásibin jáne ıadrolyq energetıkany damytý, ónerkásip, ınnovatsııalar, tehnıkalyq retteý, elektr energetıkasy, geologııa jáne jer qoınaýyn paıdalaný, munaı hımııasy, eksporttyq baqylaý, qorshaǵan ortany qorǵaý, agroónerkásiptik keshen, jylý berý maýsymdaryna daıyndyq jáne olardy ótkizý, tótenshe jaǵdaı jáne jumyldyrý jumysy, ǵarysh qyzmeti, baılanys jáne basqa máselelerge jetekshilik etedi.
Premer-Mınıstrdiń orynbasary Eraly Toǵjanov bilim men ǵylymdy damytý, densaýlyq saqtaý, áleýmettik jańǵyrtý, jumyspen qamtý, mádenıet pen sportty, týrızmdi damytý, memlekettik jastar jáne otbasy saıasaty, qoǵamdyq sanany jańǵyrtý, konfessııaaralyq jáne etnosaralyq kelisimdi qamtamasyz etý, memlekettik tildi damytý, demografııalyq jáne kóshi-qon saıasaty máselelerine jaýapty. Sondaı-aq úılestiriletin máseleler qatarynda memleket pen azamattyq qoǵamnyń ózara is-qımyly máseleleri bar.
Premer-Mınıstrdiń orynbasary Muhtar Tileýberdi syrtqy saıası baǵdardy iske asyrý, syrtqy ekonomıkalyq saıasatty júzege asyrý jáne halyqaralyq sharttardyń jasalýyn úılestirý, onyń ishinde QR Memlekettik shekarasyn mejeleý, shegendeý, syrtqy ınvestıtsııalardy tartý, Qazaqstan Respýblıkasynyń shet memlekettermen jáne halyqaralyq uıymdarmen saýda-ekonomıkalyq, qarjylyq, ǵylymı jáne ǵylymı-tehnıkalyq, mádenı, sondaı-aq basqa da baılanystaryn keńeıtý máselelerimen aınalysady. Sonymen qatar kóshi-qon salasyndaǵy halyqaralyq yntymaqtastyq, shet eldermen úkimetaralyq komıssııalardyń qyzmetin úılestirý de kiredi.
Premer-Mınıstrdiń orynbasary Baqyt Sultanov saýda saıasaty, tarıf saıasaty, Eýrazııalyq ekonomıkalyq odaq aıasyndaǵy yntymaqtastyq, Dúnıejúzilik saýda uıymy sheńberindegi yntymaqtastyq máselelerine jetekshilik etedi.
Premer-Mınıstrdiń orynbasary Erulan Jamaýbaev qarjy sektory, makroekonomıkalyq saıasat, bıýdjet, salyq jáne keden saıasaty, memlekettik josparlaý júıesi, shaǵyn jáne orta kásipkerlikti damytý, kontsessııa máselelerin qosa alǵanda, memlekettik-jekeshelik áriptestikti damytý máselelerin úılestiredi. Sondaı-aq ınvestıtsııalyq saıasat, statıstıka, jobalyq basqarýdy damytý, kásipkerler úshin ákimshilik kedergilerdi azaıtý («Doing Business» máseleleri), halyqaralyq qarjy ınstıtýttaryn úılestirý máseleleri bekitildi. Buǵan qosa ekonomıkany monopolııasyzdandyrý, kvazımemlekettik sektor sýbektileriniń qyzmetin reformalaý, bıznestiń problemalyq máselelerin qaraý jáne sheshý qyzmetterin retteıdi.
