Álıhan Smaıylov Qyrǵyz Respýblıkasynyń Úkimet basshysymen kelissóz júrgizdi
NUR-SULTAN. QazAqparat – Sholpan-Ataǵa jumys sapary aıasynda QR Premer-Mınıstri Álıhan Smaıylov Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarovpen ekijaqty kelissóz júrgizdi, dep habarlaıdy QR Úkimetiniń baspasóz qyzmeti.
Kezdesý basynda Álıhan Smaıylov Reseı Federatsııasynyń Ýlıanov oblysynda Qyrǵyzstan azamattarynyń kólik apatyna ushyrap, qaza bolýyna baılanysty kóńil aıtty.
«Osyndaı aýyr kezde qaıǵylaryńyzǵa ortaqpyn, zardap shekkenderdiń tez saýyǵyp ketýin tileımin. Qazaqstan Prezıdenti jáne óz atymnan jaqyndarynan aıyrylǵan otbasylarǵa jáne jalpy baýyrlas qyrǵyz halqyna kóńil aıtamyn», — dedi Premer-Mınıstr.
Úkimet basshysy Qyrǵyz Respýblıkasynyń baýyrlas el, sondaı-aq Qazaqstannyń óńirdegi negizgi saıası jáne ekonomıkalyq áriptesteriniń biri ekenin atap ótti.
«Eki el arasyndaǵy yntymaqtastyqtyń barlyq spektri boıynsha tabysty ózara is-qımyl jolǵa qoıylǵan», — dedi Álıhan Smaıylov.
Premer-Mınıstr osy jyldyń naýryz jáne mamyr aılarynda ótken memleket basshylarynyń kezdesýleri barysynda ekijaqty strategııalyq áriptestiktiń aldaǵy baǵyttary aıqyndalǵanyn eske saldy.
«Bizdiń negizgi maqsatymyz – memleket basshylary qoıǵan mindetterdi tolyq júzege asyrý jáne qazaq-qyrǵyz yntymaqtastyǵyn odan ári nyǵaıtý. Atap aıtqanda, ózara saýda kólemin 2 mıllıard dollarǵa deıin ulǵaıtý», — dedi Álıhan Smaıylov.
Kezdesý barysynda taraptar birlesken ındýstrııalyq saýda-logıstıkalyq keshen salý, sondaı-aq qorshaǵan ortany qorǵaý, sý-energetıka salasyndaǵy ózara is-qımyl máselelerin jáne t.b. talqylady.
