Álıhan Smaıylov qurǵaqshylyqqa tózimdi astyq suryptaryn ázirleýdi tapsyrdy
NUR-SULTAN. QazAqparat – QR Premer-Mınıstri Álıhan Smaıylov Aýyl sharýashylyǵy mınıstrligine ǵalymdarmen birlesip qurǵaqshylyqqa tózimdi astyq suryptaryn ázirleýdi tapsyrdy, dep habarlaıdy QazAqparat tilshisi.
Úkimet otyrysynda kóktemgi egis jumystarynyń qarqynyna «jaqsy» dep baǵa bergen Premer-Mınıstr birneshe máseleni atap kórsetti.
«Birinshi. Aýyl sharýashylyǵy mınıstrligi ǵylymı qoǵamdastyqpen birlesip, qoldanbaly ǵylymı zertteýlerdi qoldaý, agroǵylymdy damytý, eldiń klımatyna saı keletin, qurǵaqshylyqqa tózimdi, túsimi joǵary sorttardy jasap shyǵarý sharalaryn qabyldaýy tıis.
Ekinshi. Aýyl sharýashylyǵy mınıstrligi óńir ákimderimen birlesip, mol ónim alýǵa múmkindik beretin agrotehnologııalyq talaptardyń saqtalýyn erekshe baqylaýda ustasyn», - dedi Álıhan Smaıylov.
Sondaı-aq, ol ákimdikterge Aýyl sharýashylyǵy, Saýda jáne ıntegratsııa mınıstrlikterimen birlesip, ósimdik sharýashylyǵy ónimderin jetkizýge aldyn-ala kelisim-sharttar jasaýdy qamtamasyz etýdi tapsyrdy.
«Aýyl sharýashylyǵy mınıstrligi men óńir ákimdikteri agroónerkásiptik keshen sýbektilerin memlekettik qoldaý sharalaryn jetildirý boıynsha josparlanyp otyrǵan ózgeristerdi bıznes qoǵamdastyqpen egjeı-tegjeıli talqylasyn.
Aýyl sharýashylyǵy mınıstrligi óńir ákimderimen birlesip, «Azyq-túlik korporatsııasyna» forvardtyq sharttar aıasynda astyq kólemin ýaqtyly jetkizý boıynsha aýyl sharýashylyǵy óndirýshileriniń mindettemeleriniń oryndalýyn qamtamasyz etsin», - dedi Úkimet basshysy.
Úkimettiń esebi boıynsha, elimizde jańa ónimdi jınap alǵansha jetetin astyq qory bar .
