Álıhan Smaıylov Kýba Premer-Mınıstrine vızasyz saparlar máselesin talqylaýdy usyndy
Álıhan Smaıylovtyń aıtýynsha, Qazaqstan men Kýba ekijaqty yntymaqtastyqty nyǵaıtýǵa jáne tereńdetýge nıetti. Atap aıtqanda, buǵan Kýbadaǵy dıplomatııalyq mıssııasynyń tolyqqandy elshilikke aınalǵany dálel.
«Eki el arasyndaǵy taýar aınalymynyń ósý qarqyny jaqsy. Osyǵan baılanysty biz ózara saýda-ekonomıkalyq is-qımyldyń basym baǵyttaryn jáne keleshektegi birlesken jobalardy aıqyndaý boıynsha birlesip jumys isteýdi jón kóremiz», - dedi Úkimet basshysy.
Sonymen qatar Premer-Mınıstr eki eldiń farmatsevtıka jáne bıotehnologııa salalaryndaǵy yntymaqtastyqty damytýda áleýeti zor ekenin aıtty. Máselen, qazirgi ýaqytta Qazaqstan men Kýbanyń tıisti kompanııalary arasynda ózara is-qımyl belgili bir deńgeıde jolǵa qoıylǵan.
«Bul bolashaqta naqty nátıjelerge ákeledi dep úmittenemiz», - dedi Premer-Mınıstr.
Sonymen qatar Álıhan Smaıylov Qazaqstan men Kýba arasyndaǵy sharttyq-quqyqtyq bazany keńeıtýdiń mańyzyn atap ótip, eki el azamattarynyń qysqa merzimdi vızasyz saparlary týraly kelisimdi talqylaýdy usyndy.
Manýel Marrero Krýs óz tarapynan Kýbanyń Qazaqstanmen ekonomıkalyq baılanystardy tereńdetýge múddeli ekenin bildirdi.
«Densaýlyq saqtaý salasy – eki el arasyndaǵy yntymaqtastyqtyń áleýeti bar salalarynyń biri. Munda biz farmatsevtıka jáne bıotehnologııa ónerkásibi, medıtsınalyq qyzmetter, akademııalyq almasý týraly aıtyp otyrmyz. Biz damyta alatyn osy salaǵa qatysty ártúrli baǵyttar bar», — dedi Manýel Marrero Krýs.
Oǵan qosa Kýba Premer-Mınıstri metallýrgııa jáne hımııa ónerkásibi, qurylys materıaldaryn óndirý, aýyl sharýashylyǵy sııaqty salalardaǵy yntymaqtastyqty nyǵaıtýǵa qyzyǵýshylyǵyn atap ótti.
Qorytyndylaı kele, Manýel Marrero Krýs QR Premer-Mınıstrin yńǵaıly ýaqytta Kýbaǵa jumys saparymen kelip qaıtýǵa shaqyrdy.