Álıhan Smaıylov Qostanaı oblysyndaǵy iri sút óńdeý kásipornynyń jumysymen tanysty
Kompanııa sút ónimderiniń 120-dan astam túrin shyǵaryp, ony ishki naryqqa jáne Reseı Federatsııasynyń aımaqtaryna eksportqa jóneltedi. Aldaǵy ýaqytta kásiporyn Qytaı naryǵyna shyǵýdy josparlap otyr.
Kompanııa zaýyttarynda zamanaýı joǵary tehnologııalyq jabdyqtar ornatylǵan. 2023 jyly nemis seriktesiniń qoldaýymen irimshikter shyǵaratyn jańa óndiristik keshen iske qosylady.
Premer-Mınıstr agroónerkásip keshenindegi basty mindetterdiń biri aýyl sharýashylyǵynyń óńdelgen básekege qabiletti ónimderin, atap aıtqanda, sút ónimderin óndirý kólemin arttyrý ekenin atap ótti.
«Ózimizdi tolyq qamtamasyz etip, sheteldik naryqtarǵa shyǵýymyz kerek. Bul baǵytta úlken áleýetimiz bar», — dedi Álıhan Smaıylov.
Sonymen qatar Premer-Mınıstr kásiporynda óńirdiń aýyl sharýashylyǵy óndirýshilerimen kezdesý ótkizdi, onda agroónimderdi qaıta óńdeý jáne eksporttaý, jumys oryndaryn qurý, sýbsıdııalaý, jeńildikti nesıe berý, sýarý, jemshóp daıyndaý jáne t. b. máseleler talqylandy.
Álıhan Smaıylov memleket óndirýshilerdi qoldaýdy kezeń-kezeńimen, onyń ishinde sýbsıdııalaý jáne kredıttik resýrstardyń qoljetimdiligin arttyrý arqyly keńeıtýdi jalǵastyratynyn atap ótti.
«Bıyl aýyl sharýashylyǵyn qarjylandyrý kólemi 2 esege artty. Agroónerkásiptik keshendi damytý azyq-túlik qaýipsizdigin qamtamasyz etý jáne áleýmettik salany nyǵaıtý turǵysynan asa mańyzdy. Biz jumsalǵan árbir teńgeniń ónimdiligi men tıimdiligin arttyrýǵa nıettimiz», — dedi Premer-Mınıstr.
«Júıeli máseleler apta saıyn qaralady, bıznestiń máselelerin sheshemiz. Aýyl sharýashylyǵy mınıstrligi qazir osy saladaǵy kásipkerlerge qoıylatyn barlyq talaptardy qaıta qarap jatyr, olardyń 20%-ǵa jýyǵy qysqartylatyn bolady. Tıisinshe, bızneske ákimshilik júkteme jaqyn arada tómendeıdi», — dep túıindedi Álıhan Smaıylov.
Foto: primeminister.kz
