Álıhan Smaıylov QHR Úkimetimen júk tasymaly jáne áýe qatynasy máselelerin talqylady

ASTANA. QazAqparat - QR Premer-Mınıstri Álıhan Smaıylov pen QHR Memlekettik keńesiniń Premeri Lı Ketsıan beınebaılanys rejıminde ótken ekijaqty kelissózder barysynda Qazaqstan-Qytaı yntymaqtastyǵyn nyǵaıtýdyń ózekti máselelerin talqylady. QazAqparat bul týraly primeminister.kz saıtyna silteme jasap habarlaıdy.

Atap aıtqanda, saýda-ekonomıkalyq jáne kólik-tranzıttik salalarda, energetıka, mashına jasaý, aýyl sharýashylyǵy, ekologııa, týrızm, qarjy sektory jáne ınnovatsııalyq tehnologııalar salasyndaǵy ózara is-qımyl máseleleri qozǵaldy.

Óz sózinde Álıhan Smaıylov ótken jyldyń qorytyndysy boıynsha Qazaqstan men Qytaı arasyndaǵy taýar aınalymynyń kólemi 14% artyp, 18 mlrd dollarǵa jetkenin atap ótti. Sonymen qatar bıyl aıtarlyqtaı ósim tirkelip otyr, 10 aıda bul kórsetkish shamamen 33% artyp, 19,7 mlrd dollardy qurady.

«Memleketter basshylary 2030 jylǵa qaraı taýar aınalymyn 35 mlrd dollarǵa deıin ulǵaıtýdy maqsat etip qoıdy. Biz qytaılyq áriptesterimizben birge osy aýqymdy mindetti iske asyrýǵa daıynbyz», — dep atap ótti Premer-Mınıstr.

Onyń aıtýynsha, jetkiziletin taýarlar men qyzmetterdiń nomenklatýrasyn odan ári keńeıtý, sondaı-aq eki eldiń isker toptary arasynda tikeleı baılanys ornatý qajet. Atap aıtqanda, Qazaqstan oń saýda trendin nyǵaıtýǵa jáne Qytaıǵa 135 taýar pozıtsııasy boıynsha óz óniminiń eksportyn ulǵaıtýǵa daıyn.

Yntymaqtastyqtyń basqa da basym baǵyttary retinde Álıhan Smaıylov munaı-gaz sektorynda jáne mashına jasaýda jańa jobalardyń iske qosylýyn, temirjol júk tasymaldaryn damytýdy, onyń ishinde Qazaqstan men Qytaı arasyndaǵy úshinshi temirjol ótkizý pýnktin ashýdy, sondaı-aq shekaradaǵy avtomobıl ótkizý pýnktteri jumysynyń tıimdiligin arttyrýdy atap ótti.

Sonymen qatar Premer-Mınıstr qazaqstandyq aýyl sharýashylyǵy ónimderiniń eksporty úshin kedergilerdi alyp tastaýdyń, jolaýshylar avıareısteriniń sanyn arttyrýdyń jáne transshekaralyq ózenderdi paıdalaný men qorǵaý jónindegi ózara is-qımyldy jandandyrýdyń mańyzdylyǵyn aıtty.

«Biz belsendi dıalogqa daıynbyz. Qazaqstan-Qytaı strategııalyq áriptestiginiń joǵary dınamıkasy barlyq baǵyttar boıynsha damıtynyna senimdimin», — dedi Álıhan Smaıylov.

Óz tarapynan Lı Ketsıan Qytaı Qazaqstandy dostyq baılanystaǵy kórshiles el jáne mańyzdy saýda seriktesi retinde qarastyratynyn atap ótti. Onyń aıtýynsha, QHR júkterdi jáne aýyl sharýashylyǵy ónimderin jetkizýdi ulǵaıtýǵa, energetıka salasyndaǵy jańa jobalardy iske qosýǵa, sondaı-aq gýmanıtarlyq baılanystar men qorshaǵan ortany qorǵaý salasyndaǵy ózara is-qımyldy damytýǵa erekshe qyzyǵýshylyq tanytyp otyr.

«Biz qazaqstandyq áriptesterimizben birlesip, elder arasyndaǵy ekijaqty qatynastardy nyǵaıtý úshin jumys isteýge daıynbyz», — dedi Lı Ketsıan.

Foto: primeminister.kz