Álıhan Smaıylov Qazaqstandaǵy sheteldik ınvestorlarmen kezdesti

NUR-SULTAN. QazAqparat - QR Premer-Mınıstri Álıhan Smaıylovtyń tóraǵalyǵymen «Qazaqstandyq sheteldik ınvestorlar keńesi» qaýymdastyǵynyń keńesi ótti, dep habarlaıdy QazAqparat.

Úkimettiń baspasóz qyzmeti taratqan málimetke sensek, taraptar ónimdi tasymaldaý jáne eksporttaý, eksporttyq baǵyttar, kıberqaýipsizdik máseleleri jáne Qazaqstan Úkimeti men sheteldik kompanııalar arasyndaǵy yntymaqtastyqtyń ózge de negizgi aspektileri jóninde pikir almasty.

Álıhan Smaıylov qalyptasqan senim deńgeıi men ózara tıimdi yntymaqtastyqqa degen ortaq umtylys yqtımal táýekelderdi barynsha azaıtýǵa, yntymaqtastyq úshin jańa perspektıvalardy ashýǵa múmkindik beretinin jetkizdi.

Qazaqstan Premer-Mınıstri keńes jumysyna belsendi qatysqany úshin QShIKQ múshelerine alǵysyn bildirip, bizdiń elimiz jańa ınvestorlardyń, sondaı-aq Qazaqstanda jumys istep jatqan ınvestıtsııalyq qoǵamdastyqtyń syndarly usynystaryna ashyq ekenin atap ótti.