Álıhan Smaıylov Qazaqstan ekonomıkasyna koronavırýstyń áseri týraly pikir bildirdi
NUR-SULTAN. QazAqparat – Premer-Mınıstrdiń birinshi orynbasary – Qarjy mınıstri Álıhan Smaıylov Qazaqstan ekonomıkasyna koronavırýs saldarynyń teris áserine qatysty pikir bildirdi, dep habarlaıdy QazAqparat tilshisi.
«Qazirgi kezde koronavırýs Qazaqstanǵa zalalyn tıgizbes úshin tıisti sharalardy qabyldap jatyrmyz. Eger de bizdiń qadamdar tabysty bolsa, sondaı-aq osy problemalardan qutylsaq, onda ekonomıkaǵa salmaq túspeıdi. Degenmen de kórshi eldermen aradaǵy qarym-qatynastar turǵysynda radıkaldy sharalardy qabyldaýǵa májbúr bolsaq (Qytaımen qatynastar boıynsha), bul qadamdardyń belgili bir deńgeıde áseri baıqalýy yqtımal», - dedi Smaıylov Parlament Májilisinde tilshiler saýalyna jaýap bere otyryp.
Sonymen qatar ol vırýsqa baılanysty týrızm salasynda tıisti deńgeıde shekteýler oryn alǵanyn eske saldy.
«Belgili bir dárejede týrıstik saparlar shektelgen, osy oraıda atalǵan elge saparǵa barýdan ýaqytsha bas tartýǵa keńes berdik. Meniń oıymsha, bul vırýsty juqtyryp alý qaýpinen saq bolý úshin bizdiń azamattar osy keńesimizge nazar aýdaratyn bolady. Qytaıdaǵy týrızmnen tartylǵan tabys osy eldiń ekonomıkasyna túsedi. Eger bizdiń azamat onda barmasa, aqsha elimizde qalady. Kerisinshe, bul úrdis Qazaqstan úshin jaqsy», - dedi ol.
Budan buryn habarlanǵandaı, búgin Májiliste Á. Smaıylov el aýmaǵynda koronavırýstyń taralýyna jol bermeýge bólingen qarjy týraly aıtyp berdi.
