Álıhan Smaıylov «Kaspıı bestigi» elderin ekologııalyq baǵdarlamany jańǵyrtýǵa shaqyrdy

ASTANA. QazAqparat - Qazaqstan Premer-Mınıstri Álıhan Smaıylov Máskeýde ótip jatqan ekinshi Kaspıı ekonomıkalyq forýmynyń plenarlyq otyrysynda sóz sóıledi, dep habarlaıdy QazAqparat Úkimettiń resmı saıtyna silteme jasap.

Premer-Mınıstr Memleket basshysynyń Kaspıı mańy azyq-túlik habyn qurý týraly bastamasyna nazar aýdardy. Sonymen birge Úkimet basshysy óńiraralyq saýdanyń áleýetin tolyq ashý úshin óńirdiń kólik baılanysyn jaqsartý qajet ekenin atap ótti. Máselen, Aqtaý porty «Úndistan – Parsy shyǵanaǵy elderi – Iran – Qazaqstan – Reseı» baǵyty úshin torapqa aınalýy múmkin.

Oǵan qosa, Álıhan Smaıylov Eýropa, Ortalyq Azııa jáne Qytaı arasyndaǵy júk tasymalyn keńeıtý úshin Transkaspıı halyqaralyq kólik marshrýtyn odan ári damytý jáne kedergilerdi birlesip eńserý qajettigin málimdedi.

«Búgin biz bastama usyndyq: áriptesterimizben bul jumysty qazirden bastaımyz dep kelistik. Tıisti jol kartasyn ázirlep, tranzıttik marshrýttarymyzdyń áleýetin keńeıtýge kirisemiz», - dedi ol.

Premer-Mınıstr yntymaqtastyqtyń taǵy bir mańyzdy qyry retinde aımaqtyq energetıkalyq qaýipsizdikti qamtamasyz etý ekenin aıtty. Bul baǵytta munaı men gazdy tereń óńdeý basymdyq bolyp tabylady.

Premer-Mınıstrdiń pikirinshe, ekologııa salasyndaǵy ózara is-qımyl da mańyzdy ról atqarady, óıtkeni Kaspıı jaǵalaýynda 15 mln-nan astam adam turady.

Úkimet basshysy «Kaspıı bestigi» elderin ekologııalyq baǵdarlamany jańǵyrtýǵa shaqyrdy.

Sońynda Álıhan Smaıylov óńir elderin týrızm salasynda birlesip, belsendi túrde áreket etýge shaqyrdy: aralas týrlardy iske qosý, krýız týrızmin damytý, vızalyq jáne kóshi-qon rejımderin yryqtandyrý jóninde sharalar qabyldaý kerek.