Álıhan Smaıylov Qarýly kúshter men barlaý qurylymdaryn reformalaý boıynsha usynystar ázirleýdi tapsyrdy
«Altynshy, Qorǵanys mınıstrligi Ulttyq ekonomıka jáne Qarjy mınıstrlikterimen birlesip, belgilengen tártippen arnaıy bólimshelerdiń áskerı qyzmetshileriniń tabysyn arttyrý, áskerdi kólik avıatsııasymen, qarý-jaraqpen jáne áskerı tehnıkamen jaraqtandyrý máselesin pysyqtasyn», - dedi Álıhan Smaıylov.
Sondaı-aq, ol Qaýipsizdik keńesi apparatynyń aldaǵy otyrysynda eldiń qorǵanys qabileti talqylanatynyn eske saldy.
«Jetinshi, Qorǵanys mınıstrligi múddeli organdarmen birlesip, Qarýly kúshter men barlaý qurylymdaryn reformalaý, áskerdiń qorǵanys qabiletin túbegeıli arttyrý jóninde usynystar ázirlep, Qaýipsizdik keńesi apparatynyń jaqyn aradaǵy otyrysyna engizsin», - dedi Premer-Mınıstr.
Úkimet otyrysynda Álıhan Smaıylov ýtılızatsııalyq alym máselesin retteýdi 3 mınıstrlikke júktedi.
«Naqty sektor boıynsha mynandaı mindetter tur. Birinshi, ýtılızatsııalyq alym máselesi boıynsha Ekologııa mınıstrligine Qarjy, Ulttyq ekonomıka mınıstrlikterimen, basqa da múddeli memlekettik organdarmen jáne ulttyq kásipkerler palatasymen birlesip, naqty iske asyrý mehanızmderi men tıisti usynystar engizýdi tapsyramyn», - dedi Úkimet basshysy.
