Álıhan Smaıylov Investıtsııalyq shtab otyrysyn ótkizdi

NUR-SULTAN. QazAqparat - QR Premer-Mınıstri Álıhan Smaıylovtyń tóraǵalyǵymen Investıtsııalyq shtab otyrysy ótti, dep habarlaıdy QazAqparat Úkimettiń resmı saıtyna silteme jasap.

Otyrysta ınvestıtsııalar tartý boıynsha 2021 jyly nysanaly ındıkatorlardyń oryndalý qorytyndysy jáne 2022 jylǵa arnalǵan josparlar qaraldy.

2021 jyly negizgi kapıtalǵa salynǵan ınvestıtsııalar kólemi 13,2 trln teńgeni qurady, bul 2020 jylǵy kórsetkishten 7,3%-ǵa artyq. Investıtsııalar ósiminiń negizgi lokomotıvteri ekonomıkanyń shıkizattyq emes sektorlary boldy. Máselen, ınvestıtsııalardyń naqty kólem ındeksteri óńdeý ónerkásibinde 1,4 ese, qurylysta 1,2 ese, aýyl sharýashylyǵynda 1,3 ese ósti.

Óńdeý ónerkásibinde ósiminiń neǵurlym joǵary kórsetkishterine metallýrgııada (+27%), toqyma óndirisinde (+28%), farmatsevtıkada (+39%), hımııa ónerkásibinde (+55%), mıneraldyq ónimderde (+100%) qol jetkizildi.

Respýblıka boıynsha negizgi kapıtalǵa ınvestıtsııalar tartý boıynsha jyldyq jospar 94%-ǵa oryndaldy.

Nysanaly kórsetkishter Shymkent qalasynda (115,5%), Aqtóbe (101,8%) jáne Qostanaı (101,3%) oblystarynda asyra oryndaldy. Qaraǵandy oblysynda (99,9%), Almaty qalasynda (99,8%), Atyraý (99,1%), Jambyl (97,4%), Pavlodar (96,2%) oblystarynda, Nur-Sultan qalasynda (96,1%) sál artta qalýshylyq bar. Shyǵys Qazaqstan (92,1%) jáne Mańǵystaý (90,8%), Almaty (89,7%), Aqmola (89,4%), Túrkistan (82,5%), Soltústik Qazaqstan (80,4%) oblystarynda jospar oryndalmaǵan.

Eń tómengi kórsetkishter Batys Qazaqstan (69,6%) jáne Qyzylorda (66,4%) oblystarynda tirkeldi. Premer-Mınıstrdiń tapsyrmasy boıynsha atalǵan eki óńir ákimderiniń orynbasarlary tártiptik jaýapkershilikke tartylatyn bolady.

2021 jyldyń 9 aıynyń qorytyndysy boıynsha QR ekonomıkasyna tikeleı sheteldik ınvestıtsııalar kólemi 49%-ǵa artyp, $18,7 mlrd qurady. Qazaqstan ekonomıkasyna is júzinde barlyq negizgi ınvestor elder boıynsha kapıtal aǵynynyń ósýi baıqalady. Top-10 ınvestor memlekettiń qataryna Nıderlandy, AQSh, Shveıtsarııa, QHR, Reseı, Ulybrıtanııa, Belgııa, Túrkııa, Ońtústik Koreıa jáne Frantsııa kirdi.

«Kósh sońynda qalǵan óńirler belgilengen KPI qatań saqtaý qajettigine nazar aýdarýy tıis. Nysanaly ındıkatorlarǵa qol jetkizbegeni úshin ákimderge derbes jaýapkershilik júkteledi. Memlekettik organdar men ákimdikter ishki jáne syrtqy ınvestıtsııalardy tartý boıynsha jumysty júıeli túrde jalǵastyrsyn», — dedi Á. Smaıylov.