Álıhan Smaıylov ınternet sapasy jaıly: Óz baqylaýymda ustaımyn

ASTANA. QazAqparat – Elimizde sapaly baılanys jáne ınternetpen qamtý isine monıtorıngti kúsheıtý usynyldy, dep habarlaıdy QazAqparat tilshisi.

«Baılanys operatorlary mindettemesiniń saqtalýyn eskere otyryp, barlyq jerde baılanys sapasy men ınternet jyldamdyǵynyń monıtorıngin kúsheıtý qajet. Halyq pen bıznestiń kóptegen problemalarynyń jedel sheshimi osyǵan baılanysty. El aýmaǵyndaǵy árbir eldi mekenge deıin tartylatyn keńjolaqty ınternet ınfraqurylymynyń ekspozıtsııasyn aıqyndaý qajet», - dedi QR Premer-Mınıstri Álıhan Smaıylov Úkimet otyrysynda.

Onyń aıtýynsha, ınternet trafıginiń jyldamdyǵy naqty kórsetilýi tıis.

«Qysqa merzimde ulttyq jobany pysyqtap, Prezıdent Ákimshiligine jetkizý qajet. Halyq pikirin eskere otyryp, barlyq problema muqııat pysyqtalýy tıis. Bul máseleni óz baqylaýymda ustaımyn», - deıdi ol.

Buǵan deıin Premer-Mınıstr baılanys operatorlarynyń ınternet sapasyna jaýapkershiligin synaǵan edi.

Sondaı-aq, jyl bastalǵaly baılanys sapasyna qatysty 5 myńǵa jýyq aryz-shaǵym túskeni belgili boldy.

Odan bólek, mınıstr Baǵdat Mýsın elimizde áli de 1,5 myńǵa jýyq aýyl keńjolaqty mobıldi ınternetke qosylmaǵanyn aıtyp ótti.