Álıhan Smaıylov ınflıatsııanyń bıylǵy mejesin atady

ASTANA. QazAqparat – Úkimet basshysy Álıhan Smaıylov Saýda jáne ıntegratsııa mınıstrligine áleýmettik mańyzy bar azyq-túlik taýarlarynyń baǵasyn ádeıi ósirý faktileriniń jolyn kesýdi tapsyrdy, dep habarlaıdy QazAqparat tilshisi.

«Birinshiden, áleýmettik mańyzy bar azyq-túlik taýarlary baǵasynyń turaqtylyǵyn qamtamasyz etý qajet. Halyq úshin bul jumystardyń mańyzy óte zor jáne ol Memleket basshysynyń erekshe baqylaýynda», - dedi Premer-Mınıstr.

Onyń aıtýynsha, baǵa belgileýge kóptegen faktorlar áser etedi.

«Mınıstrlik tıisti memlekettik jáne jergilikti atqarýshy organdarmen birge úılesimdi jumys isteýi tıis. Deldaldyq áreketterdi anyqtaý jáne áleýmettik mańyzy bar azyq-túlik taýarlarynyń baǵasyn ádeıi ósirý faktileriniń jolyn kesý úshin tıisti jumystardy kúsheıtýdi tapsyramyn.

Sondaı-aq saýda ústemesi men syıaqylardy, jańa formattaǵy aınalym shemasyn iske asyrýdy baqylaýdy belsendi túrde júrgizý qajet. 2023 jyly ınflıatsııa deńgeıi 9,5%-ten aspaýy tıis. Bul – bizdiń basty mindetimiz», - dedi Álıhan Smaıylov.