Álıhan Smaıylov ǵasyr jasaǵan soǵys ardagerin quttyqtady
Soltústik Qazaqstan oblysyna jumys saparymen barǵan QR Premer-Mınıstri Álıhan Smaıylov jaqynda 100 jasqa tolǵan mereıtoıyn atap ótken Uly Otan soǵysynyń ardageri Valentına Volkodavpen kezdesip, ony aldaǵy Jeńis kúni merekesimen quttyqtady.
«Siz – aty ańyzǵa aınalǵan jeńimpazdardyń birisiz. Tabandylyq, qaısarlyq pen ór rýhtyń arqasynda Siz adamzattyń baǵa jetpes qundylyǵy – erkindikti qorǵap qaldyńyz. Búginde qazaqstandyqtar beıbit aspan astynda eńbek etip, jetistikterine qýanyp, bolashaǵyna zor senimmen qaraı alady. Munyń bárine Uly Jeńis qaharmandarynyń, sonyń ishinde Sizdiń arqańyzda qol jetkizildi», — dedi Álıhan Smaıylov.
Premer-Mınıstr bizdiń mindetimiz – óskeleń urpaqty joǵary patrıottyq qundylyqtarǵa tárbıeleý ekenin atap ótti.
«Sizdi quttyqtaı otyryp, Uly Otan soǵysynyń barlyq batyryna qurmet kórsetemin. Zor densaýlyq pen sarqylmas kúsh-qýat tileımin! Sizdiń ónegeli ómir jolyńyz ben ǵıbratty ǵumyryńyz jastarymyzǵa úlgi bolsyn», — dep túıindedi Úkimet basshysy.
Aıta ketsek, Valentına Volkodav 1922 jyly 22 naýryzda dúnıege kelgen. 1941 jylǵy 1 qazanda Qyzyl ásker qataryna shaqyrylyp, 1945 jylǵy 20 qazanda jaýyngerlik jolyn aıaqtady. 1-shi Belarýs jáne 1-shi Ýkraına maıdandarynda serjant ataǵynda qyzmet etti.
Valentına Arhıpovna — 2-dárejeli Otan soǵysy ordeniniń, «Varshavany azat etkeni úshin», «Berlındi alǵany úshin», «Eńbek ardageri» jáne basqa da medaldardyń ıegeri. 1962 jyldan bastap Tselınogradtaǵy keramıka zaýytynda býhgalter bolyp jumys istedi, al 1992 jyldan bastap Petropavlda turady. Zeınetkerdiń tórt nemeresi jáne úsh shóberesi bar.
