Álıhan Smaıylov elge ınvestıtsııa tartý jolyndaǵy kedergilerdi atady

NUR-SULTAN. QazAqparat - QR Premer-Mınıstriniń birinshi orynbasary- Qarjy mınıstri Álıhan Smaıylov Úkimet otyrysynda elge ınvestıtsııa tartý jolyndaǵy kedergilerdi atady, dep habarlaıdy QazAqparat tilshisi.

«Sońǵy jyldary álemdik ınvestıtsııalyq aǵymdardyń serpininde tómendeý baıqalady. Jahandyq tikeleı ınvestıtsııalar kólemi 2017 jyly 23 paıyzǵa, 2018 jyly 19 paıyzǵa tómendegen. Tıisinshe, ınvestıtsııalyq aǵymdar úshin álemde besekelestik kúrt ósýde. Tómendeý trendi jalpy jahandyq deńgeıde de, damýshy elderde de baıqalady», - dedi ol.

Álıhan Smaıylovtyń aıtýyna qaraǵanda, ásirese damýshy elderde ınvestıtsııalar úshin básekelestik artyp keledi.

«Osyny bizdiń kórshilerimiz aıqyn kórsetip otyr. Máselen, 2019 jyldyń 15 naýryzynda Qytaı sheteldik ınvestıtsııalar týraly jańa zań qabyldady. Sarapshylardyń baǵalaýynsha, on jyl ishinde bul qadam olardyń ekonomıkasyna 1,5 trln AQSh dollaryn tartýǵa múmkindik beredi. Reseıde tikeleı ınvestıtsııalar qory qurylǵan. 50-den asa jobaǵa 1,5 trln rýblden astam ınvestıtsııa júzege asyryldy. Ózbekstanda da bıyldyń qańtarynda 1 mlrd dollarmen tikeleı ınvestıtsııalar qory quryldy», - dedi birinshi Vıtse-premer.

Onyń atap ótýinshe, Qazaqstannyń shıkizattyq emes sektoryna ınvestıtsııa tikeleı jalpy ınvestıtsııalardyń jalpy kóleminiń úshten bir bóligin ǵana quraıdy.

«Sondyqtan, bizge sapaly ınvestıtsııa tartý úshin jańa tetikter kerek. Qoldanystaǵy mehanızmderge taldaý júrgizilip, tıimsizderi belgilendi. Negizgi tujyrym mynadaı: qazirgi ýaqytta memlekettik organdar men uıymdar arasynda ınvestıtsııa salasynda ınvestıtsııalardy jalpy úılestirý joq. Investıtsııalyq klımatty qalyptastyrýda mınıstrlikter, ulttyq kompanııalar, ákimdikter men basqalar aınalysady. Biraq olar árqaısysy óz betimen jumys jasaıdy. AHQO-da jasalǵan quraldar paıdalanbaıdy. Álemdik ınvestıtsııalyq qoǵam úshin túsinikti formatta resimdelgen jáne usynylǵan tartymdy jobalardyń sany jetkiliksiz», - dedi Álıhan Smaıylov.