Álıhan Smaıylov Ekonomıkany monopolııasyzdandyrý jónindegi komıssııanyń otyrysyn ótkizdi

ASTANA. QazAqparat - Álıhan Smaıylov Ekonomıkany demonopolızatsııalaý jónindegi komıssııanyń kezekti otyrysyn ótkizdi, dep habarlaıdy QazAqparat Úkimettiń resmı saıtyna silteme jasap.

Qatysýshylar kólik, munaı óńdeý jáne aqparattyq kommýnıkatsııa salalaryndaǵy keıbir aktıvterdi memleket menshigine qaıtarý máselelerin talqylady.

Komıssııa tóraǵasy Álıhan Smaıylov ýákiletti organdarǵa qaralyp otyrǵan aktıvterge qatysty tekserý is-sharalaryn jalǵastyrýdy, sondaı-aq olardyń keıbireýlerin jeke menshikke berýdiń zańdylyǵy turǵysynan aýdıt júrgizýdi tapsyrdy.

Budan basqa, Básekelestikti qorǵaý jáne damytý agenttigi munaı óńdeý kásiporyndaryna logıstıkalyq jáne servıstik qyzmetter kórsetetin domınant kompanııalardyń tarıfterin retteý jóninde usynystar engizýi tıis.

Komıssııa otyrysynyń qorytyndysy boıynsha Álıhan Smaıylov el zańnamasyna sáıkes qajetti rásimderdi tezdetip aıaqtaýdyń mańyzdylyǵyn atap ótti.

Foto: primeminister.kz