Álıhan Smaıylov Ekonomıkany demonopolızatsııalaý jónindegi komıssııa otyrysyn ótkizdi

NUR-SULTAN. QazAqparat - QR Premer-Mınıstri Álıhan Smaıylovtyń tóraǵalyǵymen el Ekonomıkasyn demonopolızatsııalaý jónindegi komıssııanyń kezekti otyrysy ótti, dep habarlaıdy QazAqparat QR Úkimetiniń baspasóz qyzmetine silteme jasap.

Otyrys aıasynda Keden odaǵynyń tehnıkalyq reglamentterine sáıkes kelmeıtin ónim shyǵaratyn jeke munaı óńdeý zaýyttarynan (MÓZ) salyqtyq jeńildikterdi alyp tastaý, bıznes sýbektilerine MÓZ-degi ınfraqurylym obektilerin qoljetimdi etý, olarda munaı ónimderin saqtaýdy reglamentteý, sondaı-aq munaı ónimderin tıeý jáne tasymaldaý qyzmetterine tarıfterdi tómendetý turǵysynan retteý boıynsha QR Energetıka mınıstrligi ázirlegen usynystar talqylandy.

Sonymen qatar MÓZ-de qaýipsizdik júıelerine aýdıt júrgizý, ónimdi óndirýdi, saqtaýdy, syrtqa shyǵarýdy jáne basqa da tehnologııalyq protsesterdi baqylaý, sondaı-aq olardyń aýmaǵynda suıytylǵan munaı gazyn saqtaý parkterin salý jáne olardyń qyzmetimen baılanysty máseleler qaraldy.

Sondaı-aq otyrysqa qatysýshylar «QazMunaıGaz» UK» AQ, «Ulttyq aqparattyq tehnologııalar» AQ jáne t. b. qyzmetine qatysty keıbir máselelerdi qarady.

Talqylaý qorytyndysy boıynsha QR Premer-Mınıstri Komıssııanyń kelesi otyrysynda sheshim qabyldaý úshin birqatar tapsyrma berdi.