Álıhan Smaıylov: EAEO ekonomıkalyq negizde damýǵa tıis
Otyrysta EAEO-daǵy ózara is-qımyldyń birqatar ózekti máselesi talqylandy. Olardyń qatarynda saýda-sattyqtaǵy kedergilerdi joıý, temirjol kóligimen júk tasymaldaýdy tsıfrlandyrý jónindegi birinshi kezektegi sharalar josparyn oryndaý, «Shyǵys – Batys» jáne «Soltústik – Ońtústik» baǵyttary boıynsha kólik ınfraqurylymyn damytý, teńizdegi ótkizý beketterinde elektrondyq qujat aınalymyn engizý, Keden odaǵynyń «Tamaq ónimderiniń qaýipsizdigi týraly» tehnıkalyq reglamentine ózgerister engizý jáne ózge de máseleler qaraldy.
Álıhan Smaıylovtyń aıtýynsha, birlesken kúsh-jigerdiń arqasynda Eýrazııalyq ekonomıkalyq odaq áleýeti zor, belsendi túrde damyp kele jatqan uıymǵa aınaldy. Búginde birlestik óziniń mańyzy men ornyn dáleldep keledi.
Elder arasyndaǵy kóptegen másele boıynsha ózara qurmet pen qoldaýǵa negizdelgen qarym-qatynastar qarqyndy damyp keledi, oǵan kópjaqty ekonomıkalyq yntymaqtastyq negiz bolyp otyr
, — dedi Úkimet basshysy.
Osy jyldyń basynan beri EAEO elderiniń negizgi óndiristik kórsetkishteri turaqty ósimdi kórsetip otyr. Máselen, óńdeýshi ónerkásip ónimin shyǵarý kólemi birinshi toqsanda 1,4% ulǵaıǵan. Osy kezeńde aýyl sharýashylyǵy óniminiń óndirisi 2,8% artty, al Qazaqstannyń EAEO elderimen taýar aınalymy 12% ósti.
Búgin EAEO organdarynda ári qaraı damý úrdisi talqyǵa túsýde. Eýrazııalyq joba ekonomıkalyq negizde damýǵa tıis dep esepteımiz
, — dedi Premer-Mınıstr.
Úkimet basshysynyń aıtýynsha, respýblıkada ónerkásip kooperatsııasy sheshýshi ról atqarady. Alaıda jobalardy tańdaý jáne damytý kezinde ortaq múddelerdi, sondaı-aq EAEO elderiniń áleýetin mindetti túrde eskerý qajet. Álemdegi qazirgi ahýaldy eskere otyryp, Qazaqstan «EAEO kooperatsııasyn damytý ortalyǵy» bolýǵa daıyn. Bul bastamany QR Prezıdenti Qasym-Jomart Toqaev Joǵary keńestiń ótken otyrysynda usynǵan bolatyn.
Kooperatsııalyq baılanystardy damytý, jańa naryqtardy ashý, biryńǵaı ekonomıkalyq keńistiktiń artyqshylyqtaryn paıdalaný ıntegratsııalyq birlestiktiń paıdasyn tolyq sezinýge múmkindik beredi
, — dedi Álıhan Smaıylov.
Oǵan qosa EAEO elderiniń tıimdi geografııalyq jaǵdaıy kólik jáne logıstıka salasyndaǵy yntymaqtastyq úshin kóptegen múmkindik ashady. Atap aıtqanda, eýrazııalyq «Shyǵys-Batys» jáne «Soltústik-Ońtústik» kúre joldaryn damytý júkterdi tasymaldaýdy jedeldetýge jáne jeńildetýge múmkindik beredi, bul jalpy qatysýshy elderdiń ál-aýqatyn arttyrýǵa yqpal etetin bolady.
Sonymen qatar Qazaqstan jahandyq turaqty jetkizý tizbegin damytýǵa úles qosýda – seriktesterimen birlesip, iri logıstıkalyq ortalyqtardy qurý boıynsha jumys istep jatyr. Atap aıtqanda, Ózbekstanmen Halyqaralyq ónerkásiptik yntymaqtastyq ortalyǵyn, Qyrǵyzstanmen saýda-logıstıkalyq keshenin qurý josparlanǵan.
Biz óńirimizdiń tranzıttik áleýetin damytý úshin kúsh-jiger jumyldyrýǵa daıynbyz. Munyń bári EAEO elderiniń eksporttyq geografııasyn keńeıtip, bizdiń ekonomıkalyq múmkindikterimizdi nyǵaıtady
, — dedi Úkimet basshysy.
Sonymen qatar Premer-Mınıstr álemde tsıfrlandyrý úrdisi damýdyń qozǵaýshy kúshine aınalyp kele jatqanyn atap ótti. Osyǵan baılanysty qatysýshy elderdiń mindeti – EAEO-ny shyn máninde tsıfrlyq óńirge aınaldyryp, ekonomıkalyq, tehnologııalyq jáne áleýmettik damýdyń jańa deńgeıine kóshý.
Tsıfrlyq josparlar bizdiń elderimizdiń azamattaryna múmkindikter teńdigin qamtamasyz etýge yqpal etedi. Bizge tsıfrlyq ınfraqurylymdy damytý úshin tehnologııalar men ınvestıtsııalardy tartý boıynsha birlesip jumys isteý kerek dep sanaımyz
, — dep túıindedi Álıhan Smaıylov.
Otyrys qorytyndysy boıynsha birqatar qujatqa qol qoıyldy.
