Álıhan Smaıylov EAEO aıasynda elektrondy kólik qujattaryna kóshýge shaqyrdy

ALMATY. QazAqparat - «Digital Almaty» forýmynyń plenarlyq otyrysynda QR Premer-Mınıstri Álıhan Smaıylov óńirdegi baılanys pen ınternettiń sapasyn jaqsartý máselesin qozǵady, dep habarlaıdy QazAqparat tilshisi.

Úkimet basshysy búginde Qazaqstanda 250-den astam turǵyny bar eldi mekender keń jolaqty ınternetpen qamtylǵanyn atap ótti.

Qalǵandary radıorelelik jeliler men tómen orbıtalyq spýtnık júıelerin paıdalanady.

«Baılanys qyzmetteriniń qoljetimdiligi men sapasyn arttyrý úshin Eýrazııa ekonomıkalyq odaǵyna múshe elder radıojıilik spektrin sınhrondaýy qajet dep sanaımyn. Biz tsıfrlyq ınfraqurylymdy damytý úshin ınvestıtsııa tartý boıynsha birlesip jumys isteýge daıynbyz»,- dedi QR Premer-Mınıstri Álıhan Smaıylov

Onyń aıtýynsha, bul aımaqtaǵy barlyq elder úshin jańa múmkindikter ashady.

Nátıjesinde odaq elderi halyqaralyq dálizdermen jáne transshekaralyq aǵyndarmen baılanysy bar joǵary jyldamdyqty derekterdi berý arnasyn jasaı alady.

«Sonymen qatar transshekaralyq elektrondy qujat aınalymyn damytyp, taratý qajet. Atap aıtqanda, logıstıkalyq kompanııalarǵa qolaıly jaǵdaı jasaý maqsatynda Qazaqstan elektrondy kólik qujattaryna kóshý jumysyn júrgizip jatyr. Biz EAEO aıasynda barlyq sheteldik ruqsat blankilerin elektrondy formatqa aýystyrýdy usynamyz»,- dedi ol.

Sondaı-aq ol qaǵaz aınalymyn joıý sybaılas jemqorlyq táýekelderin azaıatyp, taýar aınalymynyń ashyqtyǵyn arttyratynyn atap ótti.

«Eń bastysy, bızneske óz shyǵyndaryn ońtaılandyrýǵa múmkindik beredi. Bul - EAEO elderiniń ózara saýda salasyndaǵy elektrondy is-qımyldyń basty baǵyttarynyń biri bolyp qala beredi. Osy jáne basqa da máseleler - tsıfrlandyrý salasyndaǵy birlesken jumysymyzdyń mańyzdy tusy»,- dedi Álıhan Smaıylov.