Álıhan Smaıylov EAEO aqparattyq júıelerin ıntegratsııalaýdy usyndy

ALMATY. QazAqparat - Integratsııalanǵan aqparattyq júıeniń tolyqqandy iske qosylýy saýdadaǵy kedergilerdi joıýǵa múmkindik beredi. Bul týraly QR Premer-Mınıstri Álıhan Smaıylov Eýrazııalyq úkimetaralyq keńestiń keńeıtilgen quramdaǵy otyrysynda aıtty, dep habarlaıdy QazAqparat tilshisi.

«Odaqtaǵy ózara is-qımyldyń tıimdiligi úshin ortaq protsester men EAEO ıntegratsııalanǵan aqparattyq júıesin is júzinde iske asyrý qajet. Der kezinde jáne tıimdi aqparat almasýsyz Odaqtyń ekonomıkalyq áleýetin damytý múmkin emes. Biriktirilgen aqparattyq júıeniń tolyqqandy iske qosylýy ózara saýdadaǵy kedergilerdiń aıtarlyqtaı bóligin joıýǵa jáne Odaqtyń tranzıttik jáne syrtqy saýda protsesterin jedeldetýge múmkindik beredi. Men elderdi ulttyq aqparattyq júıelerdi ıntegratsııalaýdy jedeldetýge shaqyramyn», - dedi QR Úkimet basshysy Eýrazııalyq úkimetaralyq keńes otyrysynda.

Buǵan deıin ol EAEO ekonomıkanyń basym salalaryndaǵy yntymaqtastyqty odan ári nyǵaıtý jóninde usynystar aıtqan bolatyn.
Eske salaıyq, sharaǵa Armenııa Premer-Mınıstri Nıkol Pashınıan jáne Belarýs Premer-Mınıstri Roman Golovchenko, Qyrǵyzstan Mınıstrler kabınetiniń tóraǵasy – Prezıdent Ákimshiliginiń basshysy Aqylbek Japarov, Reseı Úkimetiniń basshysy Mıhaıl Mıshýstın, Eýrazııalyq ekonomıkalyq komıssııa Alqasynyń tóraǵasy Mıhaıl Mıasnıkovıch, sondaı-aq EAEO baqylaýshy memleketterdiń ókilderi: Ózbekstan Premer-Mınıstri Abdýlla Arıpov jáne Kýbanyń Reseı Federatsııasyndaǵy elshisi Hýlıo Antonıo Garmendııa Penıa qatysty.