Álıhan Smaıylov Dohada Power International Holding tóraǵasymen kezdesti

DOHA. QazAqparat - Doha qalasynda ótip jatqan Qatar ekonomıkalyq forýmy aıasynda QR Premer-Mınıstri Álıhan Smaıylov Power International Holding tóraǵasy Mýtaz ál Haııatpen kezdesti, dep habarlaıdy QazAqparat Úkimet basshysynyń baspasóz qyzmetine silteme jasap.

Taraptar medıtsına, aýyl sharýashylyǵy jáne týrızm salalaryndaǵy ınvestıtsııalyq jobalardy júzege asyrý máselelerin talqylady.

Power International Holding – Taıaý Shyǵystaǵy iri konglomerattardyń biri. Onyń qatysýymen fýtboldan Álem chempıonaty qarsańynda Qatarda úlken obektiler salyndy. Holdıngtiń negizgi baǵyttary qurylys, aýyl sharýashylyǵy, ónerkásip, densaýlyq saqtaý syndy salalardy qamtıdy.

«Bulardyń barlyǵy Qazaqstan ekonomıkasy úshin basym sektorlar bolyp tabylady. Bizdiń ózara tıimdi seriktestikti damytýǵa zor áleýet bar», — dedi Premer-Mınıstr.

Sondaı-aq Úkimet basshysy Power International Holding-i Qatar men Qazaqstan arasynda áriptestik baılanysty ornatý jáne damytýda ózindik kóshbasshyǵa aınalǵanyn atap ótti.