Álıhan Smaıylov: Dızel otyny ishki naryqqa deldalsyz jetkiziledi

NUR-SULTAN. QazAqparat – Qabyldanyp jatqan sharalardyń nátıjesinde janar-jaǵarmaı naryǵyndaǵy ahýal bir qalypqa kelip jatyr. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Іshki naryqty qamtamasyz etý, janar-janarmaı naryǵyndaǵy jaǵdaıdy turaqtandyrý úshin Úkimet barlyq qajetti shuǵyl sharalardy qabyldady. Premer-Mınıstrdiń birinshi orynbasarynyń tóraǵalyǵymen tıisti jedel komıssııa quryldy. Ol óńirlerdi munaı ónimderimen qamtamasyz etý boıynsha kúndelikti, júıeli jumys júrgizip jatyr. Sondaı-aq ár oblysta munaı bazalary men usaq janar-jaǵarmaı quıý beketterin baqylaý jónindegi óńirlik komıssııalar quryldy. Ákimder óńirlik komıssııalardyń jumysyn kúsheıtip, zań buzýshylyq anyqtalsa, jedel shara qabyldaýy tıis», - dedi Á. Smaıylov.

Onyń aıtýynsha, zaýyttarda munaı óńdeý jáne dızel otynyn óndirý kólemi ulǵaıtyldy.

«Munaı ónimderin áketýge jol bermeý maqsatynda qajetti eksporttyq shekteýler engizildi, dızel otyny ishki naryqqa deldalsyz jetkiziledi. Qabyldanyp jatqan sharalardyń nátıjesinde janar-jaǵarmaı naryǵyndaǵy ahýal bir qalypqa kelip jatyr. Degenmen, jaǵdaıdy únemi nazarda ustap, qatań baqylaý qajet. Mysaly, keıbir óńirlerde suıytylǵan gazdyń tapshylyǵy oryn alyp otyr. Sondyqtan keshendi jumysty odan ári jalǵastyrý kerek, óńirlerde otyn tapshylyǵy bolmaýy tıis», - dedi Úkimet basshysy.

Buǵan deıin belgili bolǵandaı, Qazaqstan 100 myń tonna dızel otynyn ımporttaıdy.