Álıhan Smaıylov derekterdi óńdeý ortalyqtaryn salýdy tezdetýdi tapsyrdy

ASTANA. QazAqparat – Úkimet basshysy Álıhan Smaıylov elimizde derekterdi óńdeý ortalyqtaryn salý jumysynyń baıaý júrip jatqanyn aıtty, dep habarlaıdy QazAqparat tilshisi.

«Qazaqstannyń tsıfrlyq-óńirlik hab atanýy baǵytynda mınıstrlik bıyl 1 naýryzǵa deıin tıisti jol kartasyn ázirlep, qabyldaýy qajet. Qazir «Kaspıı VOLS» jáne «Batys-Shyǵys» gıpermagıstrali jobasy aıasynda Qazaqstan arqyly Eýropa men Shyǵys Azııany baılanystyrýǵa múmkindik beretin transshekaralyq talshyqty-optıkalyq magıstraldar salý boıynsha jumys júrip jatyr. Talshyqty-optıkalyq magıstraldar salýdy ýaqtyly aıaqtap, derekterdi óńdeý ortalyqtaryn iske qosý transshekaralyq magıstraldardyń resýrstaryn jınaqtaýǵa múmkindik beredi», - dedi Álıhan Smaıylov Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysynda.

Sondaı-aq, Premer-Mınıstrdiń málimdeýinshe, jańa ortalyqtar álemdik derekter aǵynynyń 3%-ten 8%-ǵa deıingi tranzıttik trafıgin óńdeýdi qamtamasyz etedi.

«Alaıda, magıstraldar men derekter ortalyǵyn salýǵa qatysty jumystar baıaý júrip jatyr. Zańnamalyq retteý jáne halyqaralyq ýaǵdalastyqqa qatysty jekelegen máseleler áli sheshilmegen. Derekterdi óńdeý ortalyǵynyń ornalasqan jeri men jumys isteý sharttary anyqtalmaǵan», - deıdi ol.

Osy oraıda Álıhan Smaıylov atalǵan máseleni mınıstrge baqylaýyna alýdy tapsyrdy.

Odan bólek, Úkimet basshysy «Samuryq-Qazyna» ulttyq qoryna bıyl 10 naýryzǵa deıin Qazaqstan men Ázerbaıjan arasyndaǵy Kaspıı teńiziniń túbinde talshyqty-optıkalyq baılanys jelilerin tóseý jónindegi jobany qarjylandyrýdy pysyqtaý tapsyrylǵanyn aıtty.

Buǵan deıin Á. Smaıylov memlekettik organdardyń jumys isteý tıimdiligine qatysty máseleni kótergen edi.

Foto: microsoft.com