Álıhan Smaıylov: Dárigerlerge materıaldyq qoldaý kórsetý úshin bıýdjet shyǵysyn ulǵaıttyq

NUR-SULTAN. QazAqparat – Úkimet basshysynyń orynbasary Álıhan Smaıylov eldegi qazirgi jaǵdaıdy jáne álemdik konıýktýrany eskere otyryp, 2020 jylǵa arnalǵan makroekonomıkalyq kórsetkishterdiń naqtylanǵanyn málim etti, dep habarlaıdy QazAqparat tilshisi.

«2020 jylǵa arnalǵan makroekonomıkalyq kórsetkishterdiń naqtylanýy – eldegi qazirgi jaǵdaıdy jáne álemdik konıýktýrany eskere otyryp, qalyptastyryldy. Boljam ózgeristeri naqty sektor ósiminiń saqtalýyn jáne qyzmetter salasynyń birtindip qalpyna kelýin qamtamasyz etýge baǵyttalǵan. Memleket basshysynyń tapsyrmasyna sáıkes naqtylaýdyń negizgi mindeti – dárigerlerge materıaldyq qoldaý kórsetý jáne pandemııanyń taralýynyń yqtımal ekinshi tolqyny boıynsha aldyn alý sharalaryn qabyldaý boldy. Osy mindetterdi sheshý úshin bıýdjet shyǵystary ulǵaıtyldy», - dedi Álıhan Smaıylov Úkimet otyrysynda.

Onyń aıtýynsha, jyl sońyna deıin medıtsına qyzmetkerleriniń aldyndaǵy barlyq mindetter oryndalady. Sonymen qatar shyǵyndardy ishki ońtaılandyrý esebinen naqty sektordy qoldaýǵa arnalǵan shyǵystar ulǵaıtylǵan.

«Parlament Májilisine barlyq materıal búgin engiziledi», - dedi ol.