Álıhan Smaıylov bıyl bolatyn ekonomıkalyq ózgeristerdi atady

ASTANA. QazAqparat – Premer-Mınıstr Álıhan Smaıylov «Bıyl Qazaqstan ekonomıkasyn ne kútip tur?» degen saýalǵa jaýap berdi, dep habarlaıdy QazAqparat tilshisi.

«Jalpy, geosaıası jaǵdaı kúrdeli bolyp qala bermek. Biz ekonomıkalyq belgisizdik jaǵdaıynda ómir súrýdi jalǵastyramyz. Energııa naryǵynda qubylmalylyq, azyq-túlik baǵasynyń ósýi bolǵandyqtan, iri ekonomıka boıynsha retsessııa qaýpi bar. Mundaı jaǵdaıǵa daıynbyz. Túrli stsenarıılerdi iske asyrý kezinde biz ekonomıkalyq saıasatqa túzetý engizemiz. Qajet bolǵan jaǵdaıda respýblıkalyq bıýdjettiń parametrlerin qaıta qaraımyz», - dedi Álıhan Smaıylov Úkimet otyrysynan keıin BAQ ókilderiniń saýalyna jaýap bere otyryp.

Úkimet basshysynyń aıtýynsha, bıyl jyl qorytyndysy boıynsha ekonomıkanyń ósýi keminde 4%-dy quraıdy degen jospar bar.

«Inflıatsııany 9,5%-dan aspaıtyn deńgeıge tómendetý jolynda jumys isteımiz. Osyndaı maqsat qoıyp otyrmyz, ol úshin Ulttyq bankpen birlesip jumys isteımiz. Ónerkásipte, óńdeý sektorynda 1,1 trln teńgege 150-ge jýyq jobany iske asyrýǵa nıettimiz. Sol sııaqty aýyl sharýashylyǵynda 540 mlrd teńgege 265 ınvestıtsııalyq jobany iske asyrý josparlanyp otyr. 400 myńnan astam jańa turaqty jumys orny qurylyp, bıyl mıllıonǵa jýyq adam jumysqa ornalastyrylady. Tikeleı sheteldik ınvestıtsııalar aǵynyn kem degende 24,4 mıllıard dollarǵa jetkizýdi kózdeımiz. Osylaısha, ekonomıkamyzdyń údemeli ári ornyqty damýyn kútemiz», - deıdi Úkimet basshysy.

Sondaı-aq, Premer-Mınıstr Ýkraınadaǵy geosaıası jaǵdaıdyń el ekonomıkasyna qalaı áser etip jatqany týraly aıtty.

«Birinshiden, Reseı men Ýkraına – álemdik astyq, azyq-túlik jáne tyńaıtqyshtar naryǵyndaǵy iri jetkizýshi elder. Qazirgi jaǵdaı álemniń barlyq elindegi azyq-túlik ál-aýqatyna áser etip jatyr. Bul – ınflıatsııalyq protsester. Osy oraıda, azyq-túlik, mıneraldy tyńaıtqyshtar men energııa baǵasynyń ósýine baılanysty álemdik retsessııa qaýpi bar. Biz Eýropadan jáne Eýropaǵa júk jetkizý boıynsha logıstıkalyq problemalardyń baryn kórip otyrmyz», - dep túsindirdi Á. Smaıylov.

Onyń málimdeýinshe, Qazaqstan barlyq eldermen saýda jáne ózara is-qımyldy odan ári jalǵastyrady.

«Ótken jyldyń qorytyndysy boıynsha syrtqy saýda aınalymy 33%-ǵa ósti. Onyń ishinde eksport 42%-ǵa, ımport 20%-ǵa artty. Úshinshi eldermen taýar aınalymy 45%-ǵa ulǵaıdy. Ózara saýdany ulǵaıtý jolynda áriptes eldermen ekonomıkalyq yntymaqtastyq jónindegi jumysty jalǵastyramyz», - deıdi Premer-Mınıstr.

Foto: t.me/Kzgovernment