​​ Álıhan Smaıylov Belarýs áriptesimen eksport máselelerin talqylady

ASTANA. QazAqparat - TMD Úkimet basshylary keńesiniń Astanadaǵy kezekti otyrysy qarsańynda Qazaqstan Úkimetiniń basshysy Álıhan Smaıylov Belarýs Premer-Mınıstri Roman Golovchenkomen kezdesti. QazAqparat bul týraly QR Premer-Mınıstriniń baspasóz qyzmetine silteme jasap habarlaıdy.

Ózara saýdany ulǵaıtý jónindegi jumys sheńberinde Qazaqstan Belarýs naryǵyna shyǵarylatyn eksportty keńeıtýdi josparlap otyr. Osyǵan baılanysty Úkimet jaqyn arada Belarýs basshylyǵynyń qaraýyna jiberiletin áleýetti eksporttyq taýarlar tizbesin jańartty.

Jalpy, ótken jyldyń qorytyndysy boıynsha elder arasyndaǵy taýar aınalymy 20% artty.

«Qazirgi tańda biz ártúrli salalarda shıkizattyq emes taýarlardyń 105 túrin jetkizý máselesin birlesip pysyqtaýǵa daıynbyz», — dedi Álıhan Smaıylov.

Ekijaqty yntymaqtastyqtyń basym baǵyttarynyń biri – ónerkásip kooperatsııasy. Búgingi tańda 1,5 myń jumys ornyn qura otyryp, birlesken 7 joba iske qosyldy, taǵy 2 joba iske asyrý satysynda.

Óz kezeginde Roman Golovchenko aýyl sharýashylyǵynda, atap aıtqanda, Qazaqstanda Belarýs tehnologııalary boıynsha taýarly sút keshenderinde birlesken jobalardy iske qosýdyń perspektıvalaryn atap ótti.

Jalpy, Belarýs Premer-Mınıstri ekijaqty qatynastardyń barlyq spektri boıynsha ózara is-qımyldy maqsatty túrde nyǵaıtýǵa daıyn ekenin aıtty.

Foto: primeminister.kz