Álıhan Smaıylov balalardyń qaýipsizdigin qamtamasyz etýge qatysty birqatar tapsyrma berdi
«Óńir ákimdikteri osy jyldyń 1 sáýirine deıin mektepterdi tıisti qaýipsizdik júıelerimen jabdyqtaý jumystaryn aıaqtaýy qajet. Bul polıtsııanyń jedel basqarý ortalyqtaryna shyǵatyn beınebaqylaýǵa, mamandandyrylǵan kúzetpen jáne dabyl knopkalarymen qamtamasyz etýge qatysty», - dedi Álıhan Smaıylov Úkimet otyrysynda.
Onyń atap ótýinshe, Oqý-aǵartý mınıstrligi múddeli memlekettik organdarmen birlesip, 3 kún merzimde Úkimetke Balalardy qorǵaý jónindegi keshendi jospardyń pysyqtalǵan jobasyn engizýi tıis. Onda ýákiletti organdardyń vedomstvoaralyq ózara is-qımyl algorıtmin jetildirý jónindegi sharalar da qamtylýy qajet.
«Oqý-aǵartý, Іshki ister, Tótenshe jaǵdaılar mınıstrlikteri bilim berý uıymdarynda qaýipsizdik talaptarynyń qatań saqtalýyna sapaly monıtorıng júrgizýi kerek. Oqý-aǵartý, Tsıfrlyq damý mınıstrlikteri men ákimdikter 15 naýryzǵa deıin Oqý protsesin tsıfrlandyrý jónindegi Jol kartasyn qabyldasyn. Onda oqý materıaldaryn tsıfrlyq formatqa kóshirý, mektepterdi ınteraktıvti jabdyqtarmen qamtamasyz etý, zamanaýı bilim berý tehnologııalaryn engizý jónindegi sharalar kózdelýi tıis», - dedi ol.
Úkimet basshysy Tsıfrlyq damý mınıstrligi óńir ákimdikterimen birlesip, mektepterdegi Internet jyldamdyǵyn arttyrý, mektepterdi talshyqty-optıkalyq, jergilikti jáne symsyz jelilermen qamtamasyz etý jóninde sharalar qabyldaýy qajettigin basa aıtty.
«Óńir ákimderi oqý oryndarynyń qaýipsizdigi men bilim berý salasyn tsıfrlandyrý máselelerin jeke baqylaýda ustaýy qajet», - dedi Álıhan Smaıylov.
