Álıhan Smaıylov azamattardyń bankrottyǵy týraly zańdy tezdetip qoldanysqa engizýdi tapsyrdy

ASTANA. QazAqparat – Qarjy mınıstrliginiń alqa májilisinde Premer-Mınıstr Álıhan Smaıylov azamattardyń bankrottyǵy týraly zańdy tezdetip qoldanysqa engizýdi tapsyrdy, dep habarlaıdy QazAqparat tilshisi.

«Jeke tulǵalardyń bankrottyǵy týraly zań 1 qańtardan bastap kúshine endi. Shamamen 1,2 mln azamat borysh aýyrtpalyǵynan bosatý tetigin paıdalana alady. Jeke tulǵalar bankrottyǵy ınstıtýtyn tolyqqandy engizý úshin zańǵa táýeldi aktilerdiń bárin tez arada qabyldap, uıymdastyrý-tehnıkalyq jumystardy aıaqtaý qajet», - dedi ol.

Premer-Mınıstr tıisti aqparattyq júıeni qysqa merzimde iske qosý kerektigin atap ótti.

«Bul qadam qajetti rásimderdi barynsha jeńildetip, jedel sheshim qabyldaýǵa múmkindik beredi», - dedi Álıhan Smaıylov.

Úkimet basshysy kóleńkeli ekonomıkaǵa qarsy is-qımyldyń negizgi baǵyttaryn da atady.

«Qabyldanǵan sharalarǵa qaramastan, onyń úlesi áli de aýqymdy. Osy baǵyttaǵy jumysty kúsheıtip, kóleńkeli ekonomıkaǵa qarsy is-qımyl jónindegi is-sharalar josparyn tolyqqandy iske asyrý qajet.

Bul jumysta jalpyǵa birdeı deklaratsııany kezeń-kezeńimen jáne ýaqtyly engizý mańyzdy.

Maqsat - jeke tulǵalardyń tabysy men múlkin baqylaýdyń tıimdi júıesin qurý ekenin atap ótkim keledi», - dedi Premer-Mınıstr.