Álıhan Smaıylov aýyl medıtsınasyn jańǵyrtý ulttyq jobasyn iske asyrý barysyn jedeldetýdi talap etti

ASTANA. QazAqparat - QR Premer-Mınıstri Álıhan Smaıylovtyń tóraǵalyǵymen ótken OMO men JAO ózara is-qımyl jónindegi úılestirý shtabynda «Aýyldyq densaýlyq saqtaýdy jańǵyrtý» ulttyq jobasyn iske asyrý barysy qaraldy, dep habarlaıdy primeminister.kz.

Densaýlyq saqtaý mınıstri Ajar Ǵınııat aldaǵy eki jylda aýyldarda jańa 655 alǵashqy medıtsınalyq-sanıtarııalyq kómek kórsetý nysandaryn salý boıynsha júrgizilip jatqan jumysty baıandady.

Olardyń qatarynda fızıoterapııa kabıneti men dárihanany, feldsherlik-akýsherlik beketterdi (aqparattandyrý kabıneti qosyldy) jáne dárigerlik ambýlatorııalardy (EDSh zaly qosyldy) qamtıtyn zamanaýı medıtsınalyq beketter bar.

Fızıoterapııa kabınetteri elektroterapııa, magnıtoterapııa, ýltradybystyq terapııa, fototerapııa, ýltrakúlgin terapııasy, ıngalıatorlar jáne basqa da qurylǵylarmen jabdyqtalatyny atap ótildi.

EShD zalynda usaq motorıkany qalpyna keltirý men damytýǵa arnalǵan túrli trenajerlar, ergoterapııaǵa arnalǵan stendter, shved qabyrǵasy, kınezoterapııaǵa arnalǵan jabdyqtar qarastyrylǵan.

Sonymen qatar barlyq jańa MSAK nysandary telemedıtsınany uıymdastyrý úshin kompıýterlik jáne medıtsınalyq jabdyqtarmen qamtamasyz etilgen.

Ulttyq joba sheńberinde ınsýlt jáne kardıologııalyq ortalyqtar, ońaltý, travmatologııa jáne ortopedııa, hırýrgııa, reanımatsııa, qarqyndy terapııa bólimsheleri ashylyp, kópbeıindi ortalyq aýdandyq 32 aýrýhanany jańǵyrtý jáne kúrdeli jóndeý, sondaı-aq zamanaýı medıtsınalyq jabdyqtarmen jaraqtandyrý jumystary júrgiziledi.

Sonymen qatar aýyldyq densaýlyq saqtaý mekemeleri úshin 1100 medıtsına qyzmetkerin daıarlaý josparlanǵan.

Olardyń arasynda dárigerler, medbıkeler, feldsherler men akýsherler bar.

Indýstrııa jáne ınfraqurylymdyq damý mınıstri Marat Qarabaev jańa medıtsınalyq nysandardyń úlgilik jobalaryn jergilikti jaǵdaıǵa beıimdeý jumystary týraly aıtty.

Ulttyq jobanyń óńirlerde júzege asyrylý barysy týraly Atyraý oblysynyń ákimi Serik Shápkenov, Qostanaı oblysynyń ákimi Qumar Aqsaqalov, Mańǵystaý oblysynyń ákimi Nurlan Noǵaev jáne Qaraǵandy ​​oblysynyń ákimi Ermaǵanbet Bólekpaev baıandady.

Úkimet basshysy jıyndy qorytyndylaı kele, úlgilik jobalardy jergilikti jaǵdaımen baılanystyrý, sondaı-aq qurylys alańdaryna ınjenerlik kommýnıkatsııa men jol tartý jumysyn jedeldetýdi talap etti.

Sonymen qatar Álıhan Smaıylov Densaýlyq saqtaý mınıstrligi Ulttyq jobany úılestirý men baqylaýdy kúsheıtýi qajet ekenin atap ótti.