Álıhan Smaıylov «Aýyl amanaty» jobasynyń iske asyrylý barysymen tanysty

ASTANA. QazAqparat – Premer-Mınıstr Álıhan Smaıylov Aqtóbe oblysyna jumys sapary barysynda aýyl turǵyndarynyń tabysyn arttyrýǵa baǵyttalǵan «Aýyl amanaty» jobasynyń iske asyrylý barysymen tanysty, dep habarlaıdy QazAqparat Úkimettiń baspasóz qyzmetine silteme jasap.

Aqtóbe oblysynyń ákimi Eraly Toǵjanov Úkimet basshysyna óńirde «Aýyl amanaty» baǵdarlamasynyń qalaı iske asyrylyp jatqany týraly egjeı-tegjeıli aıtyp berdi. Qazir óńir turǵyndary «Aýyl amanaty» aıasynda 6,5 mlrd teńge somaǵa 1 486 jobany qarjylandyrýǵa ótinim berdi. 1 389 joba maquldanyp, onyń 930-y 4 mlrd teńgege qarjylandyryldy. Nátıjesinde 1 122 jańa jumys orny quryldy, 103 myńnan astam qus satyp alyndy, 48 jylyjaı salyndy. 146 ga alqapqa kartop jáne basqa da kókónister egildi. Sondaı-aq aýylda 389 jańa shaǵyn bıznes nysany ashyldy (naýbaıhana, et, sút óńdeý boıynsha shaǵyn tsehtar jáne t.b.).

Premer-Mınıstr azamattardyń ál-aýqatyn arttyrý Úkimettiń negizgi mindetteriniń biri ekenin atap ótti.

«Aýyl amanaty» jobasyn iske asyrý tájirıbesi barlyq óńirge keńinen taralýy tıis. Bıyl oǵan 100 mlrd teńge bólindi. Sonyń esebinen aýylda kóptegen kásipkerlik bastamany qoldaý josparlanyp otyr. Kelesi jyly taǵy 100 mlrd teńge bólemiz. Jobanyń arqasynda aýyldyq eldi mekenderde ómir súrý deńgeıi aıtarlyqtaı jaqsarmaq. Aqtóbe oblysy – jobany iske asyrý boıynsha jetekshi óńirlerdiń biri. Osy qarqynmen bul jumysty jalǵastyrý qajet», - dedi Álıhan Smaıylov.

Sonymen qatar Aqtóbe oblysynda kepilge qoıatyn múlki joq az qamtylǵan otbasylardy qoldaý úshin taýarlyq nesıe berý tetigi engizildi.