Álıhan Smaıylov AHQO sotynyń tóraǵasymen kezdesti
Kezdesýde Úkimet basshysy Qazaqstanda qarjy sektoryn damytýǵa erekshe kóńil bólinetinin atap ótti.
«AHQO – ınvestorlar úshin qolaıly orta qurý, baǵaly qaǵazdar naryǵyn damytý jáne ony halyqaralyq kapıtal naryǵymen biriktirý arqyly ekonomıkaǵa ınvestıtsııa tartatyn ortalyq», — dedi Álıhan Smaılov.
Premer-Mınıstr AHQO quramyna kiretin sot pen Halyqaralyq tórelik ortalyǵy (HTO) ınvestorlar senimin nyǵaıtýda, quqyq daýlaryn sheshý kezinde beıtaraptylyqqa kepil berýde mańyzdy ról atqaratynyn aıtty.
Óz kezeginde Lord Mans atap ótkendeı, Eýrazııa aýmaǵynda kommertsııalyq daýlardy sheshýde AHQO soty men HTO birinshi kezekte tańdap alynady.
«Biz búkil álemde qurmetke ıe zań ústemdigin, sot tóreligin jáne jalpy quqyqty belsendi túrde ilgerilete otyryp, Qazaqstanda ınvestıtsııalyq klımatty damytýǵa eleýli úles qosamyz», — dedi Lord Mans.
Búginge deıin AHQO soty jáne HTO 1 091 isti qarady, onyń ishinde 36 sot sheshimi shyǵarylyp, saıtta jarııalandy. Sondaı-aq 1 055 tórelik jáne medıatıvtik is HTO-da qaraldy.
Kezdesý barysynda taraptar AHQO sotynyń qazirgi qyzmeti men aldaǵy josparlaryn talqylady.
Aıta keteıik, 2018 jylǵy 1 qańtardan bastap AHQO-da daýlardy sheshý jónindegi táýelsiz organ – AHQO soty jumys isteıdi. Ol erekshe mártebege ıe jáne QR sot júıesine kirmeıdi.
Sottyń is júrgizý erejeleri aǵylshyn jalpy quqyǵynyń normalary men qaǵıdattaryna, sondaı-aq úzdik halyqaralyq tájirıbege negizdelgen.
Búgingi tańda AHQO sotynda 27 elden 358 zańger usynylǵan. Onyń ishinde qazaqstandyq zańgerler de bar.
2019 jyldyń basynda ejustice daýlardy sheshý onlaın-júıesi iske qosyldy. Ol taraptarǵa AHQO jáne HTO Sotyna álemniń kez kelgen núktesinen elektrondyq túrde talap qoıýǵa múmkindik beredi.
