Álıhan Smaıylov 3 jyldyq bıýdjette MÁMS-ke bólinetin qarajattyń nelikten qysqarǵanyn túsindirdi
Senattyń jalpy otyrysynda depýtat Sultanbek Mákejanov Mindetti áleýmettik medıtsınalyq saqtandyrý júıesin engizý halyq úshin bazalyq medıtsınalyq qyzmetterdiń qoljetimdiligin kezeń-kezeńimen arttyrýǵa múmkindik bergendigin aıtty.
Onyń aıtýynsha, qaralyp otyrǵan «2022-2024 jyldarǵa arnalǵan respýblıkalyq bıýdjet týraly» zań jobasynda osy salaǵa arnalǵan 3 jyldyq bıýdjet 537 mlrd 888 mln teńgege azaıtylǵan. Sonymen qatar senator 3 jyldyq bıýdjette medıtsınalyq kómektiń kepildik berilgen kólemine arnalǵan shyǵystar somasy da azaıtylyp qarastyrylǵanyn jetkizdi. Mysaly ol shyǵystar 2021 jyly – 1 mlrd 333 mln teńge bolsa, 2022 jyly – 1 mlrd 211 mln teńge.
«Osyǵan oraı salany qarjylandyrýdyń tómendeýi, halyqtyń jeńildik sanaty bar adamdar bóligine qalaı áser etedi? Memleket basshysynyń medıtsına qyzmetkerleriniń jalaqysyn kezeń-kezeńimen arttyrý jónindegi tapsyrmasy qalaı iske asyrylady?», - dep surady ol Úkimet basshysynyń birinshi orynbasary Álıhan Smaıylovtan.
Suraqqa jaýap bergen birinshi vıtse-premer densaýlyq saqtaý júıesin qarjylandyrý óte mańyzdy másele ekendigin atap ótti.
«Pandemııanyń aldynda, 2019 jyly densaýlyq saqtaý salasyna 1,2 trln teńge bólinse, kelesi jyly bul salaǵa 1,8 trln teńge bólinedi. ıAǵnı, 2 jyldyń ishinde densaýlyq saqtaý salasyna bólinetin qarjy 50 paıyzǵa ósip otyr. Bul ósim osy saladaǵy memlekettiń barlyq mindettemelerin tolyq oryndaýǵa múmkindik beredi. Onyń ishinde medıtsına qyzmetkerleriniń jalaqysyn 2,5 esege kóterý, medıtsına salasynda jańa nysandar salý, bastalǵandaryn aıaqtaý, medıtsınalyq-sanıtarlyq alǵashqy kómek pen Mindetti áleýmettik medıtsınalyq saqtandyrý júıesin qarjylandyrý, sanıtarlyq-epıdemıologııalyq is-sharalardy iske asyrýǵa múmkindik beredi. Sonymen birge memlekettiń áleýmettik saladaǵy mindettemelerin kúrt ósirýge jol bermeý kerek dep oılaımyz. Sondyqtan 3 jyldyq bıýdjet josparlanǵan kezde halyqtyń 15 sanaty boıynsha Áleýmettik medıtsınalyq saqtandyrý qoryna bólinetin qarajaty eseptegende halyqtyń medıan jalaqysyn esepke aldyq. Bul kórsetkish halyqtyń naqty ortasha tabysy kórsetedi», - dedi Álıhan Smaıylov.
