Álıhan Smaıylov 1-jartyjyldyqta ósim kórsetken salalardy atady
«Birinshi jartyjyldyqtyń qorytyndysy boıynsha jalpy ishki ónim 5 paıyzǵa naqty túrde ósip otyr. Negizinen buǵan taý-ken óndirý jáne óńdeý ónerkásibi, qurylys jáne qyzmet kórsetý salalary úles qosty. Óńdeý ónerkásibi boıynsha mashına jasaýda – shamamen 30, onyń ishinde avtomobıl jasaýda – 40, lokomotıvter men vagondar óndirisinde – 36, elektr jabdyqtaryn shyǵarýda 35 paıyz ósim tirkeldi. Jeńil ónerkásip – 24, onyń ishinde tekstıl óndirisi 42 paıyzǵa jýyq ósti», - dedi ol.
Úkimet basshysynyń dereginshe, sýsyndar, azyq-túlik, plastmassa buıymdary, mıneraldy ónimder, daıyn metall buıymdary óndirisi de ulǵaıdy. Hımııa ónerkásibinde ósim 3,5 paıyzdy qurady.
«Taý-ken salasyndaǵy oń serpin shıki munaıdyń 5,6 jáne tabıǵı gazdyń 2,5 paıyz ulǵaıýy esebinen qamtamasyz etildi. Qurylysta 12 paıyzdan astam ornyqty ósim qalyptasty. Aýyl sharýashylyǵynda ósim – 3 paıyz. Qyzmet kórsetý salasy shamamen 5 paıyzǵa ósti. Ol saýda-sattyqtyń - 10,4, aqparat pen baılanystyń - 8,8 jáne kólik salasynyń 7,4 paıyzǵa ósýi esebinen qamtamasyz etildi. Taý-ken óndirýdi esepke almaǵanda negizgi kapıtalǵa salynǵan ınvestıtsııalar 14 paıyzǵa jýyq ósti», - dedi Álıhan Smaıylov.
