Álıhan Smaıylov 1 aı ishinde halyqtyń tabysyn arttyrý baǵdarlamasyn ózektendirýdi tapsyrdy
«Prezıdent Jarlyǵymen bekitilgen Memleket basshysynyń saılaýaldy baǵdarlamasyn iske asyrý jónindegi is-qımyl josparynyń is-sharalaryn mınıstrlikterdiń salalyq tujyrymdamalary men damý josparlaryna qosý kerek. Biz olardy kelesi jyldyń basynda bekitemiz», - dedi Úkimet basshysy.
Álıhan Smaıylov Ulttyq ekonomıka mınıstrligi múddeli memlekettik organdarmen birlesip, ákimshilik reforma aıasynda memlekettik basqarý deńgeıleri arasynda fýnktsııalardy qaıta bólý arqyly zańnamalyq aktilerdi júıeli tekserýdi aıaqtaýy tıistigin basa aıtty.
«Tıisti zań jobasyn ázirlep, ony 2023 jyldyń 1 naýryzyna deıin Májiliske engizý kerek. Qazirgi syn-qaterlerdi eskere otyryp, bir aı ishinde Inflıatsııany baqylaý jáne tómendetý jónindegi is-sharalar keshenin jańartý qajet. Sonymen qatar, bir aı ishinde Halyqtyń tabysyn arttyrý baǵdarlamasyn ózektendirý kerek. «Qarapaıym zattar ekonomıkasy» baǵdarlamasy aıasynda syıaqy stavkalaryn sýbsıdııalaý merzimin 7 jylǵa deıin uzartýdy qarastyrý qajet», - dedi ol.
Onyń atap ótýinshe, Ulttyq ekonomıka mınıstrligi Ulttyq bankpen, Qarjy naryǵyn retteý jáne damytý agenttigimen birlesip, tutynýshylyq kredıt berý kólemin qysqartý is-sharalaryn ázirleýi tıis.
«Aýyl sharýashylyǵy mınıstrligimen birlesip, 2023 jylǵy 1 aqpanǵa deıin Aýyldyq aýmaqtardy damytýdyń 2023–2027 jyldarǵa arnalǵan tujyrymdamasynyń jobasyn ázirlep, Premer-Mınıstr Keńsesine engizsin. Sondaı-aq, ákimdikterdiń qurylymdary boıynsha, onyń ishinde ákimder orynbasarlarynyń sany boıynsha qazirgi shtattyq lımıt sheginde ákimdermen kelisilgen pozıtsııany engizý kerek», - dedi Álıhan Smaıylov.