Álıhan Smaıylov jumys saparymen Qyrǵyzstanda júr
QR Premer-Mınıstri Álıhan Smaıylov úkimet deńgeıindegi birqatar iri is-sharaǵa qatysý úshin Bishkek qalasyna (Qyrǵyzstan) jumys saparymen bardy, dep habarlaıdy Kazinform.
ShYU-ǵa múshe memleketterdiń Úkimet basshylary keńesiniń otyrysynda Shanhaı Yntymaqtastyq Uıymynyń keńistiginde saýda-ekonomıkalyq jáne mádenı-gýmanıtarlyq salalardaǵy ózara is-qımyldy nyǵaıtý jónindegi sharalar talqylanady.
TMD elderi Úkimet basshylary keńesi men Eýrazııalyq úkimetaralyq keńes sheńberinde keń aýqymdaǵy yntymaqtastyq máselelerin talqylaý josparlanǵan.
Onyń ishinde geodezııa jáne kartografııa salasyndaǵy ózara is-qımyl, taýarlardy sertıfıkattaý jáne kedendik deklaratsııalaý, ónerkásiptiń túrli salalarynda kooperatsııalyq jobalardy iske asyrý, energetıka jáne aýyl sharýashylyǵy salalaryndaǵy birlesken qadamdar qaralady.
Іs-sharalar qorytyndysy boıynsha birqatar qujatqa qol qoıylady dep kútilip otyr.
