Álıhan Smaıylov jol boıyndaǵy servıs jaıly: Tapsyrma berildi, biraq ózgergen eshteńe joq

Jol boıyndaǵy servıs obektileri standarttarǵa saı kelmeıdi. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy Kazinform.

«Halyqaralyq júk tasymalyn júzege asyrýǵa ruqsat beretin blankilerdi bólýde de problemalar bar. Mundaı ruqsattardy biz kóptegen memlekettermen parıtet negizinde alyp otyrmyz. Otandyq júk tasymaldaýshylarǵa blank berý mehanızmin qaıta qarap, olarǵa artyq talap qoımaý qajet», - dedi Premer-Mınıstr.

Úkimet basshysy jol boıyndaǵy servıs boıynsha da suraqtar bar ekenin aıtty.

«Máselen, Batys Eýropa – Batys Qytaı tranzıttik dáliziniń iske qosylǵanyna 5 jyldan assa da, jol boıyndaǵy servısti áli kúnge deıin damyta almaı kelemiz. Bul týraly birneshe ret aıtyldy, tıisti tapsyrmalar berildi, biraq ózgergen eshteńe joq. Halyqaralyq joldar men ishki marshrýttardyń bárinde de osyndaı jaǵdaı», - dedi Álıhan Smaıylov.

Onyń atap ótýinshe, servıs obektileri úshin jol boıynan jer ýchaskesin berýdi ákimdikter sozyp jiberdi.

«Osyǵan baılanysty, ınfraqurylymnyń damýy toqtap tur. Onyń ústine, biz Ulttyq standartty baıaǵyda qabyldap qoıdyq. Onda jol boıyndaǵy servıs obektileri men kórsetiletin qyzmetterge qoıylatyn talaptar belgilengen. Bul qosymsha tranzıt kólemin tartýǵa múmkindik berer edi. Alaıda, servıs obektileriniń kóbi bizdiń standartqa sáıkes kelmeıdi», - dedi Úkimet basshysy.